1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں
Russland Moskau SOMMER 2022 | Verhaftung Brittney Griner, US-Basketballspielerin
تصویر: Evgenia Novozhenina/REUTERS

امریکہ اور روس کے درمیان قیدیوں کا تبادلہ

9 دسمبر 2022

قیدیوں کے تبادلے میں روس کے سابق اسلحہ ڈیلر وکٹر بوٹ اور امریکی باسکٹ بال کھلاڑی برٹنی گرائنر کی رہائی عمل میں آئی ہے۔ سعودی عرب اور امارات کا کہنا ہے کہ رہائی ان کی ثالثی سے ہوئی لیکن واشنگٹن نے اس کی تردید کی ہے۔

https://p.dw.com/p/4Khhv

ماسکو نے امریکی باسکٹ بال اسٹار اور اولمپک گولڈ میڈلسٹ برٹنی گرائنر کو امریکہ میں قید روس کے سابق اسلحہ ڈیلر وکٹر بوٹ کے بدلے میں رہا کر دیا۔

قیدیوں کا یہ تبادلہ ایک ایسے وقت ہوا ہے جب یوکرین پر روسی حملے کے بعد سے امریکہ اور روس کے درمیان کشیدگی عروج پر ہے۔ گزشتہ آٹھ ماہ میں دونوں ملکوں کے درمیان یہ قیدیوں کے تبادلے کا دوسرا موقع ہے۔ قیدیوں کا یہ تبادلہ جمعرات کے روز ابوظبی ہوائی اڈے پر ہوا۔

امریکی صدر جو بائیڈن نے گرائنر کی رہائی کی اطلاع ایک ٹویٹ کے ذریعے دیتے ہوئے بتایا، "وہ محفوظ ہیں، وہ طیارے میں ہیں اور اپنے وطن لوٹ رہی ہیں۔" انہوں نے ٹوئٹ کے ساتھ گرائنر کے شوہر چارلی گرائنر کی ایک تصویر بھی پوسٹ کی ہے۔

امریکی اراکین کانگریس، کھلاڑیوں اور دیگر افراد نے گرائنر کی رہائی پر مسرت کا اظہار کیا ہے۔

روسی وزارت خارجہ رنے بھی قیدیوں کے اس تبادلے کی تصدیق کی ہے۔ اس نے ایک بیان میں کہا کہ بوٹ اپنے وطن پہنچ گئے ہیں۔

روسی میڈیا کی جانب سے جاری ویڈیوز میں گرائنر کو ایک روسی طیارے سے ابو ظہبی ہوائی اڈے پر اترتے اور امریکی حکام کو ان کا استقبال کرتے ہوئے دیکھا جاسکتا ہے۔ جب کہ روسی حکام، 'موت کا سوداگر' کے  نام سے مشہور بوٹ کو گلے لگاتے نظر آرہے ہیں۔

امریکہ اور روس کے درمیان جاسوسوں کا تبادلہ

بعد میں روسی ٹیلی ویزن پر ایک ویڈیو نشر کی گئی جس میں بوٹ کو ماسکو میں ایک طیارے سے اترتے ہوئے دیکھا جاسکتا ہے۔ ان کی والدہ اور اہلیہ بھی اس موقع پر موجود تھیں۔

امریکی صدر باییڈن برٹنی گراینئر سے فون پر بات کرتے ہوئے
امریکی صدر باییڈن برٹنی گراینئر سے فون پر بات کرتے ہوئےتصویر: White House via Reuters

سعودی عرب اور امارات کا ثالثی کا دعوی

سعودی عرب اور متحدہ عرب امارات کا کہنا ہے کہ روس اور امریکہ میں قیدیوں کا تبادلہ اماراتی صدر محمد بن زاید النہیان اور سعودی ولی عہد محمد بن سلمان کی کوششوں سے ہوئی۔ تاہم وائٹ ہاوس نے اس کی تردید کرتے ہوئے کہا کہ یہ رہائی واشنگٹن اور ماسکو کے درمیان بات چیت کے نتیجے میں عمل میں آئی۔

قیدیوں کا تبادلہ، طالبان نے امریکی انجینئر کو رہا کر دیا

سعودی عرب کی سرکاری خبر رساں ایجنسی ایس پی اے کے مطابق سعودی عرب اور یو اے ای کی وزارت خارجہ کی جانب سے مشترکہ بیان میں کہا گیا ہے کہ دونوں ممالک کی ثالثی کی کوششوں کی کامیابی ان کی امریکہ اور روسی فیڈریشن کے ساتھ باہمی اور ٹھوس دوستی کی عکاسی کرتی ہے۔ بیان میں فریقین کے درمیان بات چیت کے فروغ میں دونوں برادر ممالک کی قیادت کے اہم کردار پر بھی روشنی ڈالی گئی ہے۔

یوکرین اور روس کے مابین قیدیوں کا تبادلہ، سہولت کار سعودی عرب

بیان کے مطابق قیدیوں کا یہ تبادلہ ابوظہبی میں متحدہ عرب امارات اور سعودی عرب کے ''ماہرین'' کی موجودگی میں ہوا۔

امریکہ کی تردید

واشنگٹن نے روس امریکہ قیدی تبادلے میں سعودی عرب اور متحدہ عرب امارات کی ثالثی کی تردید کی ہے۔

وائٹ ہاؤس کی پریس سکریٹری کیرن ژاں  کا کہنا تھا کہ امریکی باسکٹ بال کھلاڑی برٹنی گرائنر کی رہائی صرف روس اور امریکہ میں بات چیت سے ہوئی ہے۔

انہوں نے مزید کہا کہ قیدیوں کے تبادلے کی بات چیت میں صرف امریکہ اور روس شامل تھے، قیدیوں کے تبادلے کی بات چیت میں کسی کی ثالثی شامل نہیں تھی۔

وکٹر باؤٹ کو ماضی میں 'موت کے سوداگر‘ کا خطاب دیا گیا تھا
وکٹر باؤٹ کو ماضی میں 'موت کے سوداگر‘ کا خطاب دیا گیا تھاتصویر: Natthawat Wongrat/Zuma/picture alliance

ایک اولمپک کھلاڑی دوسرا 'موت کا سوداگر'

باسکٹ بال اسٹار32 سالہ برٹنی گرائنردو مرتبہ کی اولمپک گولڈ میڈلسٹ ہیں۔ انہیں 17 فروری کو ماسکو کے ایک ہوائی اڈے پر اس وقت گرفتار کیا گیا تھا جب ان کے سامان سے بھنگ کا تیل برآمد ہوا تھا، جو روس میں غیر قانونی ہے۔

برٹنی نے جولائی میں جرم کا اعتراف کرلیا تھا تاہم ان کا کہنا تھا کہ اس کے پیچھے کوئی مجرمانہ نیت نہیں تھی بلکہ جلدی میں پیکنگ کے دوران یہ تیل ان کے سامان میں بند ہو کر ان کے ساتھ آگیا تھا۔

روسی عدالت نے چار اگست کو برٹنی کو نو برس قید کی سزا سنائی تھی۔ بائیڈن انتظامیہ نے ان کی گرفتاری کو "غلط" قرار دیا تھا اور برٹنی کی رہائی کے لیے ان پر شدید دباو تھا۔

وکٹر باؤٹ جنہیں ماضی میں 'موت کے سوداگر‘ کا خطاب دیا گیا تھا، سابق سوویت فوج کے لیفٹننٹ کرنل رہے ہیں۔ امریکی محکمہ انصاف نے ماضی میں انہیں دنیا کے سب سے بڑے ہتھیاروں کے ڈیلروں میں سے ایک قرار دیا تھا۔ انہیں سن 2008 میں تھائی لینڈ میں گرفتار کیا گیا تھا اور اس کے دو برس بعد امریکہ کے حوالے کر دیا گیا تھا۔

وکٹر باؤٹ، جن کی زندگی پر ایک ہالی وڈ فلم بھی بن چکی ہے کروڑوں ڈالر کے ہتھیار بیچنے کی سازش میں امریکہ میں 25 برس کی قید کاٹ رہے تھے۔

گوانتانامو بے کا ’معمر ترین قیدی‘ رہا، پاکستان کے حوالے کر دیا گیا

قیدیوں کے اس تبادلے میں ایک اور امریکی شہری پاؤل وہلن شامل نہیں ہیں جو جاسوسی کے الزام میں چار برس سے روس میں قید میں ہیں۔ پاؤل کو سن 2020 میں 16 برس قید کی سزا سنائی گئی تھی۔

امریکہ کے بعض ریپبلیکن اراکین کانگریس نے بوٹ کے جرائم اور وہلن کو رہا نہ کیے جانے کا حوالہ دیتے ہوئے قیدیوں کے تبادلے کی نکتہ چینی کی ہے۔

 ج ا/ ص ز (روئٹرز، اے پی، اے ایف پی)

ملتے جلتے موضوعات سیکشن پر جائیں
ڈی ڈبلیو کی اہم ترین رپورٹ سیکشن پر جائیں

ڈی ڈبلیو کی اہم ترین رپورٹ

Syrien Harim Dorf Besnia | schwere Schäden nach Erdbeben

ترکی اور شام میں زلزلہ: ہلاکتوں کی تعداد تقریباﹰ پانچ ہزار

ڈی ڈبلیو کی مزید رپورٹیں سیکشن پر جائیں
ہوم پیج پر جائیں