یورپ کے کماؤ دارالحکومت
بہت سے یورپی ملکوں کے دارالحکومت معاشی سرگرمیوں کے اہم مراکز بھی ہیں۔ کولون کے انسٹیٹیوٹ فار اکنامک ریسرچ (IW) نے ایک جائزہ مرتب کیا ہے کہ ان دارالحکومتوں کی کمائی کے بغیر ان ممالک میں فی کس آمدنی کتنی رہ جائے گی۔
برلن پر انحصار؟
جرمنی کا دارالحکومت برلن ایک استشنیٰ ہے۔ IW کے حساب کتاب کے مطابق برلن کو اگر نکال دیا جائے تو جرمنی میں فی کس آمدنی 0.2 فیصد بڑھ جائے گی۔ دیوار برلن گرائے جانے کے بعد سے اس شہر میں نئی صنعتیں تو لگی ہیں مگر روزگار کے مواقع زیادہ نہیں بڑھ پائے۔ یہاں بے روزگاری کی شرح مجموعی قومی اوسط سے زیادہ ہے۔
پیرس، فرانس کا دل
فرانس میں صورتحال مختلف ہے۔ پیرس ہر لحاظ سے اس ملک کا دل ہے۔ Total, Renault اور Axa جیسی بڑی کمپنیوں کے ہیڈکوارٹرز اس شہر یا اس کے قریب واقع ہیں۔ پیرس سیاحوں کے لیے بھی ایک مقناطیس کی حیثیت رکھتا ہے جبکہ اس کے ارد گرد کا علاقہ صنعتی طور پر انتہائی مستحکم ہے۔ پیرس کے بغیر فرانس میں فی کس آمدنی 15 فیصد کم ہو جائے گی۔
ناگزیر لندن
برطانیہ بھی اپنے دارالحکومت لندن کے بغیر کافی غریب ہو جائے گا، یعنی قریب 11 فیصد۔ نیویارک کے علاوہ لندن کا مالیاتی شعبہ دنیا میں اہم ترین گردانا جاتا ہے۔ اس کے علاوہ ریئل اسٹیٹ اور آئی ٹی کے شعبے اس شہر کو معاشی حوالے سے بھی انتہائی اہم بناتے ہیں۔
ایتھنز، یونانی معیشت کا ستون
یونان کی ایک تہائی سے زیادہ آبادی دارالحکومت ایتھنز میں آباد ہے۔ دارالحکومت کے گرد ونواح کا علاقہ بہت سی کمپنیوں کا گڑھ ہے جبکہ یہاں شپ یارڈز اور ٹیکنالوجی کی بھی کئی کمپنیاں موجود ہیں۔ ایتھنز ہزاروں برسوں سے یونانی تہذیب کا مرکز ہے۔ آج اس کے بغیر یونانی کی فی کس آمدنی 20 فیصد تک کم ہو جائے گی۔
بیلجیم برسلز کے بغیر؟
دارالحکومت برسلز بیلجیم کے تین حصوں میں سے سب سے چھوٹا علاقہ ہے مگر معاشی اعتبار سے اہم ترین مرکز ہے۔ اگر برسلز کو نکال دیا جائے تو بیلجیم کی فی کس آمدنی نو فیصد تک کم ہو جائے گی۔ برسلز کی 90 فیصد معیشت کا دار و مدار سروس سیکٹر پر ہے۔ اس شہر میں یورپی یونین کے کئی ادارے اور نیٹو کے ہیڈکوارٹرز بھی موجود ہیں، جن کی وجہ سے یہاں معاشی سرگرمی کافی زیادہ رہتی ہے۔
تمام راستے روم کو جاتے ہیں
روم کے بغیر اٹلی میں فی کس آمدنی صرف دو فیصد کم ہو گی۔ یہ شہر پبلک سیکٹر کے حوالے سے شہرت رکھتا ہے جبکہ سیاحت کا بھی اہم مرکز ہے۔ مگر زیادہ تر اطالوی صنعتیں ملک کے شمال میں واقع ہے۔
کوپن ہیگن: چھوٹی جل پری کا گھر
اس کے علاوہ ڈنمارک کا دارالحکومت دنیا کی سب سے بڑی بحری مال بردار کمپنی Maersk اور کارلسبرگ کا آبائی شہر بھی ہے، جو ایک بہت بڑی بیئر کمپنی ہے۔ یہاں کئی کیمیکل اور فارماسیوٹیکل کمپنیوں کے ہیڈکوارٹرز بھی ہیں۔ ڈنمارک کی زیادہ تر صنعت بھی دارالحکومت کے گرد ونواح میں ہی قائم ہے۔ IW کے مطابق اگر کوپن ہیگن کو نکال دیا جائے تو ڈنمارک میں فی کس آمدنی 13 فیصد کم ہو جائے گی۔