یورپ میں سائیکلنگ کے دس بہترین رُوٹ
یورپ میں سائیکل سواروں کی تعداد بہت زیادہ ہے اور یہی وجہ ہے کہ تقریباﹰ سبھی یورپی ممالک میں سائیکلیں چلانے والوں کے لیے علیحدہ راستے موجود ہیں۔ آئیے یورپ میں سائیکلنگ کے دس بہترین راستوں کی سیر کرتے ہیں۔
دسواں نمبر: ڈراوا سائیکلنگ رُوٹ
اٹلی میں جنوبی ٹیرول سے سلووینیہ تک 366 کلومیٹر طویل سائیکل راستہ ہے، جس کا ایک سرا دریائے ڈراوا کے منبع سے جڑا ہے۔ اگلے کچھ برسوں میں اسے دریائے ڈینیوب اور کرویشیا سے گزرنے والے دریائے ڈراوا تک بڑھا دیا جائے گا۔
نواں نمبر: اَیلبے سائیکل رُوٹ
یہ راستہ چیک جمہوریہ کے دارالحکومت پراگ سے شروع ہوتا ہے اور دریائے اَیلبے کے کنارے کنارے 1220 کلومیٹر تک آگے بڑھتے ہوئے اسی دریا کے ساتھ ریتلی چٹانوں کے علاقے کرکونوسے جرمن شہروں ڈریسڈن، ماگڈے بُرگ اور ہیمبرگ سے ہوتا ہوا بحیرہ شمالی تک جاتا ہے۔
آٹھواں نمبر: کلاؤڈیا آگُسٹا رُوٹ
کلاؤڈیا آگُسٹا رُوٹ نامی یہ سائیکلنگ ٹریک جرمن علاقے ڈوناؤ وؤرتھ سے شروع ہو کر قریب سات سو کلومیٹر دور اطالوی شہر وَینس تک جاتا ہے۔ اس قدیم رومن راستے کے ذریعے سائیکل سوار ایلپس کے پہاڑی سلسلے اور جنوبی ٹیرول کی رَیشن جھیل کو بھی عبور کرتے ہیں۔
ساتواں نمبر: دریائے اِن کا سائیکل ٹریک
یہ راستہ سوئٹزرلینڈ کے علاقے مالویا سے ہو کر جرمن شہر پاساؤ سے بھی گزرتا ہے۔ راستے میں پڑنے والے ایلپس کے اونچے پہاڑیوں کی وجہ سے ٹانگوں کے مضبوط پٹھے درکار ہوتے ہے، تاہم سائیکل سواروں کو نہایت حسین مناظر سے لطف اندوز ہونے کا موقع بھی ملتا ہے۔ یہ راستہ جرمن علاقے باویریا سے ہوتا ہوا دریائے اِن (Inn) کے کنارے قصبے مِیوہل ڈورف کے مارکیٹ اسکوائر سے بھی گزرتا ہے۔
چھٹا نمبر: بحر اوقیانوس سے بحیرہء اسود تک
یہ ساڑھے چار ہزار کلومیٹر سے بھی طویل سائیکلنگ رُوٹ بحر اوقیانوس کے کنارے فرانس کی Loire وادی سے شروع ہو کر بحیرہ اسود تک جاتا ہے۔ مشرق اور مغرب کو ملانے والے اس راستے میں یورپی ثقافت اور تاریخ کے شہری نمونوں کے نمائندہ نانت، اورلیاں، بازل، لِنس، بوڈاپسٹ، بلغراد اور بخارسٹ جیسے کئی شہر پڑتے ہیں۔
پانچواں نمبر: اَیچ سائیکل رُوٹ
یہ قریب تین سو کلومیٹر طویل راستہ رَیشن سے ویرونا تک دریائے اَیچ کے ساتھ ساتھ جاتا ہے، جو جنوبی ٹیرول کا سب سے لمبا دریا ہے اور بحیرہ آڈریا میں جا کر گرتا ہے۔ کلاؤڈیا آگُسٹا سائیکلنگ ٹریک کے متوازی بنایا گیا یہ رُوٹ بہت ہی خوبصورت ہے۔
چوتھا نمبر: بحیرہ شمالی کا ساحلی سائیکل رُوٹ
بحیرہ شمالی کے کنارے کے ساتھ ساتھ چلنے والا یہ راستہ چھ ہزار کلومیٹر طویل ہے، جو جزائر شَیٹ لینڈ سے ناروے میں بَیرگن کے علاقے تک جاتا لے۔ یہ راستہ یورپی سائیکلسٹوں کی فیڈریشن کے نیٹ ورک میں شامل ’یورو وَیلو 12‘ رُوٹ کہلاتا ہے۔
تیسرا نمبر: جھیل کونسٹانس سائیکل رُوٹ
جھیل کونسٹانس کا سائیکلنگ ٹریک سب سے زیادہ استعمال ہونے والے سائیکلنگ راستوں میں تیسرے نمبر پر آتا ہے یہ 260 کلومیٹر طویل ہے اور جرمنی، آسٹریا اور سوئٹزرلینڈ کی سرحدوں کے ساتھ ساتھ اس جھیل کے کناروں کا احاطہ کرتا ہے۔ اسی لیے سائیکل سوار اس راستے کے وہ مناظر دیکھ کر بہت خوش ہوتے ہیں، جو اپنی مثال آپ ہیں۔
دوسرا نمبر: رائن سائیکل رُوٹ
سوئٹزرلینڈ میں دریائے رائن کے منبع سے ڈچ شہر روٹرڈم کے قریب بحیرہ شمالی تک جانے والے اس راستے کو ’یورو وَیلو 15‘ کا نام دیا جاتا ہے، جو 1230 کلومیٹر طویل ہے۔ یہ راستہ دنیا کے سب سے زیادہ استعمال ہونے والے سائیکل ٹریکس میں سے ایک سمجھا جاتاہے۔
پہلا نمبر: ڈینیوب بائیک پاتھ
یہ جرمنی کا سب سے معروف طویل المسافتی سائیکلنگ ٹریک ہے۔ ڈینیوب بائیک پاتھ ساڑھے اٹھائیس سو کلومیٹر طویل ہے۔ یہ برَیگ کے جرمن علاقے سے شروع ہوتا ہے، جہاں سے دریائے ڈینیوب جنم لیتا ہے اور وہاں سے رومانیہ میں ٹولچیا کے نواح میں ڈینیوب کے ڈیلٹا تک جاتا ہے۔ اسی راستے پر آسٹرین دارالحکومت ویانا بھی واقع ہے۔ یہ سائیکل رُوٹ اور دریا دونوں آٹھ ملکوں سے گزرتے ہیں۔