یورپی چیمپئن شپ کے ’ستارے‘
کھیلوں کے کسی بھی اہم مقابلے میں کچھ نئےکھلاڑی ابھر کر سامنے آتے ہیں۔ تاہم فرانس میں فٹ بال کی یورپی چیمپئن شپ میں ایسے بہت سے فٹ بالر شامل ہیں، جو پہلے ہی ’اسٹار‘ بن چکے ہیں۔ ان میں چند کھلاڑیوں کی تصاویر
ڈیوڈ الابا
یوڈ الابا بے شک اپنے کلب بائرن میونخ میں ایک دفاعی کھلاڑی کے طور پر شامل ہیں تاہم وہ اپنی قومی ٹیم آسڑیا کا اہم ترین مڈ فیلڈ کھلاڑی بھی ہیں۔ الابا نے یورپی کپ کے لیے کوالیفائینگ میچوں میں تین گول کیے اور تین مرتبہ فٹ بال کو گول میں پہنچانے میں اہم کردار ادا کیا۔ الابا پہلی مرتبہ یورپی چیمپئن شپ میں حصہ لے رہے ہیں۔
گیرتھ بیل
گیرتھ بیل 26 سال کی عمر میں ہی ثابت کر چکے ہیں کہ وہ ایک پھرتیلے اور باصلاحیت فٹ بالر ہیں۔ وہ اپنی قومی ٹیم ’ویلز‘ کے ایک ایسے اہم کھلاڑی ہیں کہ جن کے پیروں کا بوسہ لیے بغیر گیند آگے نہیں بڑھ پاتی۔ سن 1958 کے بعد پہلی مرتبہ ویلز کی ٹیم کسی بڑے ٹورنامنٹ میں حصہ لے رہی ہے۔
ہاکان شالھان اوغلو
ہاکان شالھان اوغلو کارنرز اور فری کِک لگانے کے ماہر ہیں لیکن اپنی ٹیم یعنی ترکی کی جانب سے کھیلتے ہوئے وہ مڈ فیلڈ میں بھی اہم کردار ادا کرتے ہیں۔ بائیس سال کی عمر میں ہی وہ ترک ٹیم کی ریڑھ کی ہڈی بن چکے ہیں۔ وہ جرمن کلب بائر لیورکوزن کی جانب سے کھیلتے ہیں۔
کرسٹیانو رونالڈو
پرتگال کے اس سپر اسٹار سے فٹ بال کے تقریباً تمام ہی مداح واقف ہیں۔ چیمئنز لیگ کے فائنل مں ان کی پینلٹی کک نے ریئل میڈرڈ کو چیمپئن بنایا ہے۔ وہ چار مرتبہ فٹ بالر آف دی ایئر کا اعزاز بھی حاصل کر چکے ہیں۔ وہ پرتگال کو یورپی چیمپئن بنانے کی بھرپور صلاحیت رکھتے ہیں۔
کیون ڈے برؤنے
کیون ڈے برؤنے نے دو سال میں برازیل میں ہونے والی فٹ بال کے عالمی کپ میں اپنی ٹیم بیلجئم کے لیے ہراول دستے کا کردار ادا کیا تھا۔ انہی کی وجہ سے بیلجئم کوارٹر فائنل تک پہنچنے میں کامیاب ہو پایا تھا۔ تاہم اس مرتبہ کیون کی کوشش ہے کہ یورپی چیمپئن شپ میں بیلجئم کا سفر کوارٹر فائنل پر ہی ختم نہ ہو جائے۔
زلاتان ابراہیمووچ
سویڈن کے ابراہیمووچ کا یہ آخری بین الاقوامی ٹورنامنٹ ہے۔ وہ ایک عرصے سے سویڈن کے اہم ترین کھلاڑی ہیں۔ وہ ایک ایسے کھلاڑی ہیں، جو گراؤنڈ میں اترنے کے بعد توجہ چاہتے ہیں۔ وہ پیرس کے کلب سینٹ گرمانیا سے بھی کھیلتے رہے ہیں۔ ان کی ماہانہ آمدنی پندرہ لاکھ یورو ہے۔
آندریس اینیئستا
ابراہیمووچ کی طرح اسپین کے آندریس اینیئستا کی بھی یہ آخری یورپی چیمپئن شپ ہے۔ فرانس میں کھیلے جانے والے ان میچوں میں بھی امید ہے کہ اینیئستا اسپین کی فتوحات میں مرکزی کردار ادا کریں گے۔ 32 سالہ اینیئستا کی صلاحیتوں کو غیر معمولی قرار دیا جاتا ہے۔
لورینزو انسینئے
لورینزو انسینئے اطالوی ٹیم کہ وہ کھلاڑی ہیں، جو یورپی چیمپئن شپ کے دوران اپنی ٹیم کی جانب سے کوئی بڑا اپ سیٹ کر سکتے ہیں۔ دو سال قبل برازیل میں ہونے والے عالمی کپ میں انہوں نے صرف ایک ہی میچ کھیلا تھا تاہم حالیہ سیزن میں بارہ گول کرنے کے بعد کوچ انتونیو کونتے انہیں ٹیم کا حصہ بنانے پر مجبور ہو گئے۔
ہیری کین
ٹوٹنہائم کلب کی جانب سے کھیلنے والے ہیری کین نے 2014ء اور 2015ء میں پریمیئر لیگ کے میچوں کے دوران اپنی صلاحیتوں کا لوہا منوایا تھا۔ ان کی اسی کارکردگی کو دیکھتے ہوئے انہیں انگلینڈ کی ٹیم میں شامل کیا گیا۔ کہا جا رہا ہے کہ وہ یورپی چیمپئن شپ میں سب سے زیادہ گول کرنے کی صلاحیت رکھتے ہیں۔
روبرٹ لیوونڈوفسکی
39 سالہ روبرٹ لیوونڈوفسکی اب تک جرمن فٹ بال لیگ بنڈس لیگا میں تیس گول کر چکے ہیں۔ امید کی جا رہی ہے کہ یورپی فٹ بال چیمپئن شپ میں اپنے ملک پولینڈ کے لیے بھی اسی طرح کی کارکردگی کا مظاہرہ کر سکیں گے۔
مانوئیل نوئر
اگر کسی بھی ٹیم کے پاس مانوئیل نوئر جیسا گول کیپر ہو تو اسے زیاہ پریشان ہونے کی ضرورت نہیں۔ گزشتہ برسوں کے دوران یہ جرمن کھلاڑی گول کیپنگ کو ایک نئی سطح پر لے گیا ہے۔ ان کا شمار دنیا کے بہترین گول کیپرز میں ہوتا ہے۔
پاؤل پوگبا
پاؤل پوگبا اپنے کلب یوونتوس کی جانب سے کھیلتے ہوئے ایک اسٹار بن چکے ہیں۔ تاہم اب فرانس کے اس کھلاڑی کے پاس خود کو ایک سپر اسٹار ثابت کرنے کے لیے یورپی چیمپئن شپ کی صورت میں ایک موقع ہے۔ وہ مڈ فیلڈ میں فرانس کے ایک اہم ترین کھلاڑی ہیں۔
آندرے یارمولینکو
یارمولینکو کا شمار فٹ بال کی دنیا کے ان چند اہم ترین نوجوان کھلاڑیوں میں ہوتا ہے، جس پر بہت سے یورپی کلبس کی نظریں جمی ہوئی ہیں۔ امید ہے کہ وہ اپنی انہی صلاحیتوں کی بنا پر اپنی ٹیم یوکرائن کو یورپی چیمپئن شپ کے اگلے مرحلوں تک لے جانے میں کامیاب ہو جائیں گے۔