ورلڈ کپ ميں کون کھيلے گا، فيصلہ اب سُپر لیگ میں ہوگا

پچاس اورز کے بين الاقوامی کرکٹ ورلڈ کپ کے ليے ٹيموں کی سليکشن اب سُپر ليگ کے ذريعے ہوا کرے گی۔ 13 ممالک کی ٹيموں پر مشتمل سپر ليگ کا اولين ٹورنامنٹ اس ہفتے برطانيہ ميں شروع ہو رہا ہے۔ پہلا ميچ دفاعی چيمپئن انگلينڈ اور آئرلينڈ کی ٹيموں کے مابين ساؤتھ ہيمپٹن ميں جمعرات کو کھيلا جا رہا ہے۔ سپر ليگ ميں پہلی 7 پوزيشنوں پر آنے والی ٹيميں 2023ء کے ورلڈ کپ کے ليے کواليفائی کر ليں گی جبکہ آٹھويں ٹيم ميزبان بھارت کی ٹيم ہو گی۔

سُپر ليگ کيا ہے؟

سابقہ کواليفائنگ نظام کے تحت ون ڈے کرکٹ ورلڈ کپ کے ليے وہ ٹيميں کواليفائی کرتی آئی ہيں، جو انٹرنيشنل کرکٹ کونسل (آئی سی سی) کی عالمی رينکنگ ميں پہلی 8 پوزيشنوں پر ہوں۔ انگلينڈ ميں منعقدہ پچھلے ورلڈ ميں دو کواليفائنگ ٹورنامنٹس کی فاتح ٹيموں کو بھی ورلڈ کپ ميں جگہ دی گئی اور يوں مجموعی طور پر 10 ٹيموں نے آئی سی سی ورلڈ کپ ميں شرکت کی۔

سپر ليگ ميں آئی سی سی کے بارہ مکمل ارکان سميت ہالينڈ کی ٹيم زور آزمائے گی۔ ہر ٹيم تين تين ميچز پر مشتمل چار سيريز ہوم گراؤنڈز پر اور چار سيريز بيرون ملکوں ميں کھيلیں گی۔ کاميابی کی صورت ميں ٹيم کو دس پوائنٹس مليں گے۔ ليکن اگر ميچ برابر رہا تو صرف پانچ پوائنٹس ديے جائيں گے۔ میچ ہارنے کی صورت ميں مذکورہ ٹيم کو کوئی پوائنٹ نہيں ملے گا۔

آئی سی سی کے جنرل مينيجر جيف ايلارڈس کے مطابق سپر ليگ آئندہ تين برسوں کے دوران کرکٹ کے کھيل پر اثر انداز ہو گی اور شائقين ميں دلچسپی کا باعث بنے گی۔

کورونا کی وبا کرکٹ پر بھی اثر انداز

سپر ليگ کا آغاز بھی کورونا کی عالمی وبا کی وجہ سے تاخير کے ساتھ ہو رہا ہے۔ آئی سی سی کے جنرل مينيجر جيف ايلارڈس نے بتايا ہے کہ وہ مختلف ملکوں کے کرکٹ بورڈز کے ساتھ رابطے ميں ہيں تاکہ سپر ليگ کے ٹورنامنٹس اور ميچز کی تاريخ کو حتمی شکل دی جا سکے۔

کورونا کی وجہ سے کرکٹ کا کھيل بھی بری طرح متاثر ہوا ہے اور کئی سيريز ملتوی يا منسوخ کی جا چکی ہيں۔ پاکستانی ٹيم تين ٹيسٹ ميچوں اور تين ٹی ٹوئنٹی ميچز کے سلسلے ميں ان دنوں برطانيہ ميں ہے۔

ع س / ع آ )اے ايف پی(