ممبئی حملوں کے بعد کیا ٹیسٹ سیریز ہو پائے گی؟
28 نومبر 2008بھارتی کرکٹ بورڈ ترجمان کے مطابق انگلینڈ کو ممبئی دھماکو ں کے بعد سیکورٹی کے حوالے سے سخت خدشات لاحق تھے۔ انہو ں نے بتایا کہ بھارتی بورڈ نے انگلش ٹیم کی درخواست پر انتیس نو مبر کوگوہاٹی او دو دسمبر کو نئی دہلی میں کھیلے جانے والے میچ منسوخ کردیئے ہیں تاہم ان کا کہنا تھا انگلش بورڈ نے ٹیسٹ سیریز کے لئے اپنی آمادگی ظاہر کر دی ہے۔ انہوں نے یہ بھی کہا کہ انگلش بورڈ کی درخواست پر دوسرا ٹیسٹ میچ جسے شیڈول کے مطابق ممبئی میں ہونا تھا اسے جنوبی بھارت میں منتقل کر دیا گیا ہے۔
دوسری جانب انگلینڈ کی ٹیم کے کپتان کیون پیٹرسن جو ہفتہ کی صبح ٹیم کے ہمراہ واپس وطن روانہ ہو رہے ہیں ان کا کہنا ہے کہ ٹیسٹ سیریز کے لئے بھارت واپسی کا فیصلہ کھلاڑیوں کی رضامندی سے ہو گا۔ ان کا کہنا تھا کہ اگر کھلاڑیوں نے ٹیسیٹ سیریز کھیلنے میں آمادگی ظاہر نہ کی تو وہ انہیں مجبور نہیں کریں گے۔ پیٹرسن نے واضح کیا کہ ہم سلامتی کی صورتحال کا جائزہ لیں گے اور اگر ہمیں شبہات ہوئے تو ہم ہر گز واپس نہیں آئیں گے۔
دونوں بورڈز نے تاحال ٹیسٹ سیریز کے شیڈول میں کسی قسم کی تبدیلی کا عندیہ نہیں دیا۔ ٹیسٹ میچ سے قبل انگلینڈ اور بھارت کے مابین پانچ دسمبر سے کھیلا جانے والا وارم اپ میچ بھی شیڈول میں ابھی تک جوں کا توں ہے تاہم سوال یہ پیدا ہوتا ہے کہ کیا انگلینڈ کی ٹیم صرف چار یا پانچ دنوں کے لئے وطن واپس جارہی ہے؟