مسجدالحرام میں حادثہ ، سو سے زائد افراد ہلاک
سعودی عرب کے شہر مکہ میں مسلمانوں کے مقدس ترین مقام کعبہ کے ارد گرد قائم مسجد الحرام میں ایک بہت بڑی کرین گرنے سے کم از کم 107 افراد ہلاک اور دیگر متعدد زائد زخمی ہو گئے ہیں۔
تحقیقاتی عمل شروع
جمعہ گیارہ ستمبر کی شام رونما ہونے والے اس سانحے کے بعد امدادی کارکن فوری طور پر متاثرہ مقام پر پہنچ گئے تھے۔ حکام نے حقائق جاننے کے لیے تحقیقاتی عمل شروع کر دیا ہے۔
بڑی تعداد میں ہلاکتیں
مسجدالحرام میں ایک بہت بڑی کرین گرنے کے نتیجے میں کم از کم 107 افراد کے ہلاک ہونے کی تصدیق کی جا چکی ہے۔ طبی حکام نے بتایا ہے کہ اس حادثے کی وجہ سے 238 افراد زخمی بھی ہوئے۔
تیز رفتار ہوائیں اور ریت کا بڑا طوفان
یہ سانحہ مکہ شہر میں چلنے والی تیز رفتار ہواؤں اور ریت کے ایک بڑے طوفان کے دوران پیش آیا۔ مزید حقائق جاننے کے لیے ماہرین کی ٹیمیں متاثرہ مقام کا معائنہ کرر ہی ہیں۔
کرین زمیں میں دھنس گئی
مسجدالحرام میں تعمیراتی مقاصد کے لیے نصب کردہ ایک بہت بڑی کرین اچانک گر پڑی اور مسجد کے احاطے میں موجود ہزاروں افراد میں سے بہت سے اس عظیم الجثہ فولادی ڈھانچے کی زد میں آ گئے۔
امدادی کارروائیاں جاری
سعودی حکام نے بتایا ہے کہ لاشوں اور زخمیوں کو ملبے سے نکال لیا گیا ہے۔ زخمیوں کو ہسپتالوں میں منتقل کیا جا چکا ہے۔ امدادی کارکن متاثرہ مقام پر موجود ہیں، جو ابتدائی تحقیقات کے بعد ملبہ ہٹانے کی تیاریوں میں ہیں۔
زخمیوں میں پاکستانی بھی شامل
پاکستانی وزارت خارجہ کے مطابق مسجدالحرام کے احاطے میں پیش آنے والے اس ہلاکت خیز حادثے میں 47 پاکستانی بھی زخمی ہوئے۔ بائیس پاکستانی شہریوں کو مکہ کے تین مختلف ہسپتالوں میں داخل کرا دیا گیا تھا، جن میں سے چھ کو ابتدائی طبی امداد کے بعد ڈسچارج کر دیا گیا ہے۔
حج متاثر نہیں ہو گا
سعودی حکام نے بتایا ہے کہ اس حادثے کی وجہ سے اس سال کا حج متاثر نہیں ہو گا۔ بتایا گیا ہے کہ ملبہ دو یا تین دن میں اٹھا لیا جائے گا اور متاثرہ حصے کی مرمت بھی جلد ہی کر دی جائے گی۔
عالمی برادری کی طرف سے اظہار افسوس
مسجدالحرام میں اس حادثے پر امریکا نے بھی اظہار افسوس کیا ہے۔ امریکی وزیر خارجہ جان کیری نے ریاض حکومت سے کہا ہے کہ امریکا اس حادثے پر دکھی ہے۔ انہوں نے کہا کہ مشکل کے اس وقت میں امریکا تمام مسلمانوں کے ساتھ ہے۔
متعدد ممالک کے شہری ہلاک
سعودی حکام نے ابھی تک ہلاک ہونے والے افراد کی شناخت ظاہر نہیں کی۔ تاہم ابتدائی معلومات کے مطابق سو سے زائد ہلاک ہونے والوں میں مختلف ممالک کے شہری شامل ہیں۔
مسلمانوں کا مقدس ترین مقام
سعودی عرب کے شہر مکہ میں واقع خانہ کعبہ مسلمانوں کا مقدس ترین مقام ہے۔ یہی وہ مقام ہے جہاں ہر سال دنیا بھر سے تعلق رکھنے والے لاکھوں مسلمان حج کا فریضہ ادا کرنے کے لیے جاتے ہیں۔