عالمی اقتصادی فورم، اصلاحات پر خصوصی توجہ

بدھ کو افتتاحی خطاب میں فرانس کے صدر نکولا سارکوزی نے مالیاتی اداروں پر مضبوط گرفت رکھنے سے متعلق امریکی صدر باراک اوبامہ کے فیصلے کی حمایت کی۔ سارکوزی نے کہا کہ حد سے زیادہ منافع پر ٹیکس کے نفاذ سے غربت کے خاتمے میں بھی مدد ملے گی۔’’غیر ضروری اضافی منافع حاصل کئے جارہے ہیں، جو اب برداشت نہیں کئے جائیں گے کیونکہ ان سے اجتماعی فوائد، جیسے ملازمتوں کے مواقع پیدا نہیں ہورہے۔‘‘

چین کا نام لئے بغیر نکولا سارکوزی نے تنقیدی انداز میں کہا کہ مالیاتی و معاشی نظام کو اس وقت تک مکمل طور پر دوبارہ بہتری کی جانب گامزن نہیں کیا جاسکتا جب تک کرنسی کی قدر میں وسیع فرق موجود رہے گا۔ سارکوزی نے تسلیم کیا کہ جب یہ طے کرلیا گیا کہ تمام فیصلے اقتصادی منڈی کے مزاج کے مطابق کئے جائیں گے، تب ہی سے عالمگیریت قابو سے باہر ہوئی۔

دوسری جانب بڑے بڑے بینکوں کے اہم عہدے داروں نے نئی پابندیوں اور ٹیکسوں کے اطلاق کو ڈاوٴس میں شدید تنقید کا نشانہ بنایا۔ برطانوی بینک بارکلے کے صدر رابرٹ ڈائمنڈ نے کہا کہ ایسا کرنے سے معیشت پر منفی اثر پڑے گا اور اس سے بہت سے لوگوں کی ملازمتیں ختم ہونے کا خدشہ بھی ہے۔

امریکی صدر باراک اوباما گزشتہ ہفتے اعلان کرچکے ہیں کہ بینکوں کو انتخاب کرنا ہوگا کہ یا تو وہ زمین کی لین دین کے معاملات میں سرگرم رہیں یا پھر روایتی طرز کی بینکاری پر توجہ دیں۔ بڑے بینکار اوباما کے اس اعلان سے خاصے ناخوش نظر آرہے ہیں۔

ڈاوٴس میں جاری اقتصادی فورم کے دوران ہیٹی کے زلزلہ متاثرین کے لئے مالی امداد اکھٹا کرنے کی مہم بھی چلائی جارہی ہے۔ اسی سلسلے میں سابق امریکی صدر بل کلنٹن بڑے بڑے تجارتی اداروں کے اعلیٰ عہدے داروں کے ساتھ ملاقاتیں کر رہے ہیں۔ کلنٹن کے بقول ہیٹی میں سرمایہ کاری کے فروغ کی ضرورت ہے تاکہ وہاں کے باسیوں کا امداد پر انحصار کم سے کم ہوسکے۔

چالیسویں سالانہ اقتصادی فورم میں تیس سربراہان مملکت اور اہم کاروباری شخصیات شریک ہیں۔ مندوبین کی مجموعی تعداد ڈھائی ہزار سے بھی زائد بتائی جاتی ہے۔

دریں اثناء سوشلسٹ نظریات کے حامیوں نے دعویٰ کیا ہے کہ ملٹی نیشنل کمپنیاں اور بعض حکومتیں کاربن گیس کے اخراج میں کمی کے معاملے پر اربوں ڈالر کمانے کی منصوبہ بندی کررہی ہیں۔ یہ نظریہ برازیل میں جاری عالمگیریت مخالف ورلڈ سوشل فورم کے دوران بیان کیا گیا۔ کینیڈا سے تعلق رکھنے والے حیاتیاتی ٹیکنالوجی کے ماہر پیٹ مونے نے سوشل فورم میں کہا کہ جن کمپنیوں نے طویل عرصے تک کاربن گیس کے اخراج میں معاونت فراہم کی، آج وہی اس پر قابو پانے کی دعوے دار ہیں۔ سوشل فورم ہر سال عالمی اقتصادی فورم کے مقابلے میں منعقد کیا جاتا ہے۔

رپورٹ : شادی خان سیف

ادارت : گوہر نذیر گیلانی.