دھونی کو دھمکی، سیکیورٹی سخت: پولیس
1 جنوری 2009پولیس ذرائع کے مطابق بھارتی ریاست جھارکھنڈ کے شہر رانچی میں واقع دھونی کے گھر کی حفاظت کے لئے 45 سے زائدکمانڈوز تعینات کئے گئے ہیں۔
کپتان دھونی کے گھر ڈاک کے ذریعے بھیجے گئے پہلے خط میں پچاس لاکھ روپے کا مطالبہ کیا گیا،جو پورا نہ ہونے کی صورت میں دھونی کو جان سے مارنے کی دھمکی دی گئی، جبکہ بدھ کو ملنے والے دوسرے خط میں دھمکی دی گئی ہے کہ پولیس کو آگاہ کرنے کی صورت میں مہندر سنگھ دھونی کے گھر کو دھماکے سے اڑا دیا جائے گا۔
جھاڑکھنڈ پولیس کے ترجمان ستیا نارائن پرادھان کے مطابق خط لکھنے والے نے اپنا نام "تسلیم" اور تعلق ممبئی کے مبینہ انڈر ورلڈ ڈان اور پولیس کو 1993 میں ہونے والے بم دھماکوں کے سلسلے میں انتہائی مطلوب داوٴد ابراہیم کے ساتھ سے بتایا ہے۔
پولیس کا کہنا ہے کہ ان خطوط کے حوالے سے تحقیقات کا آغاز کردیا گیا ہے۔ بھارتی کپتان کو پچھلے سال بھی ماوٴ نواز باغیوں کی جانب سے قتل کی دھمکی دی گئی تھی، جس کے بعد ان کی سیکیوریٹی میں اضافہ کردیا گیا تھا۔