افریقہ کے بھورے شہری ’البینو‘، خود کو چھپانے کی ضرورت نہیں
افریقہ میں بھورے افراد یعنی البینوز کو ستایا جاتا ہے، دھمکیاں دی جاتی ہیں اور ان سے رابطے کو پسند نہیں کیا جاتا۔ ان میں سے چند افراد نے اس نفرت کے خلاف کچھ کرنے کی ٹھانی ہے۔ ڈی ڈبلیو کی افریقہ کے کچھ البینوز سے ملاقات۔
گورا رنگ خوبصورتی کی علامت
تھنڈو ہوپا کا تعلق جنوبی افریقہ سے ہے اور اس کی عمر بیس اور تیس برس کے درمیان ہے۔ وہ پیدا ہوئی تو اسے ہر وقت اپنی جلد کو دھوپ سے بچانے کے لیے کریم لگانا پڑتی تھی، اپنے جسم کو مکمل طور پر ڈھانپنا پڑتا تھا اور یوں وہ ایک احساس کمتری کے ساتھ پروان چڑھی۔ وہ ہمیشہ سائے کی تلاش میں رہتی تھی تاہم اب ہوپا اپنے جیسے لوگوں کے حقوق کے لیےسرگرم ہے۔ وہ ایک ماڈل بھی بن چکی ہے۔
احساس کمتری کے خلاف ’کیٹ واک‘
جنوبی افریقہ کے ایک ڈیزائنر گیئرٹ یوہان کوئٹزے نے چار سال قبل تھنڈو ہوپا کو ایک طرح سے دریافت کیا تھا۔ آج کل وہ اپنے ملک کی معروف ترین ماڈلز میں سے ایک ہے۔ وہ 2013ء میں فوربز لائف افریقہ نامی فیشن میگزین کے سر ورق پر بھی موجود تھی۔
توہم پرستی کی انتہا
افریقہ میں جرائم پیشہ افراد ایک طرح سے البینو شہریوں کے پیچھے پڑے رہتے ہیں۔ انہیں اغوا کیا جاتا ہے اور قتل کر کے ان کے اعضاء عاملوں کو فروخت کر دیے جاتے ہیں، جو انہیں جادو ٹونے کے لیے استعمال کرتے ہیں۔ اقوام متحدہ کے مطابق ایک البینو کی قیمت ساٹھ ہزار یورو تک ہوتی ہے۔ ان کی صرف ایک ٹانگ ہی دو ہزارو یورو تک میں فروخت ہوتی ہے۔
خوف میں زندگی
ڈوروتھی ماؤسین کا تعلق ملاوی کے مشنگا صوبے سے ہے۔ وہ کہتی ہیں کہ انہوں نے خود کو کبھی بھی محفوظ تصور نہیں کیا۔ ایک اندازے کے مطابق اس جنوب مشرقی افریقی ریاست میں دس ہزار کے لگ بھگ البینو رہتے ہیں۔ ان میں سے اٹھارہ کو گزشتہ برس قتل کیا گیا۔ ملاوی کی پولیس کے مطابق البینو شہریوں پر ایک سال میں ساٹھ سے زائد حملے رپورٹ کیے گئے تاہم اصل تعداد اس سے کہیں زیادہ ہو سکتی ہے۔
چوبیس گھنٹے تحفظ
رازق جفالی کی نظر ہر وقت اپنے بیٹے پر رہتی ہے۔ ان کی کوشش ہے کہ ان کے تین سالہ بیٹے قاسم کو کوئی نقصان نہ پہنچائے۔ اس مقصد کے لیے انہیں اپنی ملازمت کی قربانی دینا پڑی۔ ملاوی کے شہری اپنی رحم دلی اور امن پسندی کی وجہ سے شہرت رکھتے ہیں۔ البینو شہریوں پر حملوں کے تناظر میں ملاوی کے صدر پیٹر موتھاریکا کا کہنا ہے کہ انہیں اس ظلم پر شرم آتی ہے۔
منڈیلا کے لیے گیت
سلیف کیٹا افریقی پوپ میوزک کی ایک جانی پہچانی شخصیت ہیں۔ وہ مالی میں پیدا ہوئے اور انہیں اس بات کا بہت اچھی طرح اندازہ ہے کہ افریقہ میں ایک البینو پر کیا گزرتی ہے۔ وہ 1984ء میں پیرس میں آ بسے تھے۔ انہیں اس وقت پذیرائی حاصل ہوئی، جب انہوں نے نیلسن منڈیلا کی سترویں سالگرہ پر لندن کے ویمبلے اسٹیڈیم میں ان کے لیے گیت پیش کیا تھا۔
البینو ہونا فخر کی بات
2015ء میں عوامی جمہوریہ کانگو میں ’’پراؤڈ ٹو بی البینو‘‘ یعنی ’’البینو ہونے پر فخر‘‘ کے نام سے ایک میلہ منقعد ہوا، جسے ایک انقلاب بھی کہا جاتا ہے۔ اس تین روزہ میلے میں مختلف البینوز نے اپنے تجربات سے دوسروں کو آگاہ کیا۔ اس میلے کا مقصد البینو کے بارے میں رائج گھسے پٹے خیالات کو غلط ثابت کرنا اور ان کے اعتماد میں اضافہ کرنا تھا۔ اس سلسلے میں ٹویٹر پر البینوز کا ہیش ٹیگ ہے #AlbinismIsJustAColor.
معاملہ صرف رنگت کا نہیں
البینوزم یا بھورے پن کا تعلق صرف جلد کی رنگت سے نہیں ہوتا۔ ایسےافراد کی جلد میں اسودین صباغ یعنی Melanin Pigment کی بھی کمی ہوتی ہے۔ یہ پگمنٹ جسم کو سورج کی شعاعوں سے تحفظ دیتا ہے۔ اس کمی کے باعث البینوز کو خطرناک حد تک جلد کا سرطان ہونے کے امکانات ہوتے ہیں۔ ان میں سے بہت سوں کی نظر بھی کمزور ہوتی ہے۔ البینوز کے لیے دھوپ سے بچنا بہت ضروری ہوتا ہے۔
نفرت کے خلاف فٹ بال
سعید سیریمانی اور ان کی ٹیم ’البینو یونائیٹڈ‘ فٹ بال کی تربیتی مشق تب شروع کرتے ہیں، جب تنزانیہ کے دارالحکومت دارالسلام سے سورج غائب ہونا شروع ہوتا ہے۔ ان کے پاس جگہ بہت کم ہے لیکن ان کے خواب بہت بڑے ہیں۔ اس ٹیم کے کھلاڑی بین الاقوامی شہرت یافتہ فٹ بالر بننا چاہتے ہیں۔ یہ لوگ ثابت کرنا چاہتے ہیں کہ ان میں ایک اچھا فٹ بالر بننے کے تمام صلاحیتیں موجود ہیں۔