په کندز کې د طالبانو په بريد کې يوولس پولیس وژل شوي

د آلمان خبري آژانس د جمعې په ورځ (د دسمبر ۶مه) د کندز د ولايتي شورا غړو مولوي عبدالله او سیف الله نوري په حواله رپوټ ورکړی دی، چې  طالبانو په امام صاحب ولسوالۍ کې د پولیسو لږ تر لږه پر دوو پوستو باندې حملې تر سره کړي دي.

اميري زياته کړه چې په د طالبانو په دغو بريدونو کې څلور تنه افسران ټپيان شوي هم دي او طالبانو لږ تر لږه درې تنه نور له خپل ځان سره بيولي دي.

د کندز امام صاحب ولسوالۍ د دغه ولايت په شمال کې د امو سيند پر غاړه او د تاجکستان هيواد سره پر ګډه پوله پرته ده چې له کلونو راهيسې په کې وسلوال طالبان فعال دي.

د رپوټونو پر اساس، د تیرې ميلادي میاشتې (نومبر) په شلمه نيټه هم طالبانو په امام صاحب ولسوالۍ کې پر امنيتي ځواکونو بريد کې ۱۲ تنه پولیس وژلي وو.