1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

کابل: د ماين چاودنې پنځه تنه ټپيان کړي

۱۴۰۰ آذر ۹, سه‌شنبه

په کابل ښار کې د سه شنبې په ورځ د سړک غاړې ماین چاودنه شوې چې د ځايي رسنيو په حواله پنځه تنه په کې ټپیان شوي دي.

https://p.dw.com/p/43eI6
Afghanistan | Taliban Kämpfer in Kabul
کابل - د آرشیف انځورانځور: Petros Giannakouris/AP/dpa/picture alliance

رويټرز خبري آژانس د آریانا نيوز تلويزيون په حواله لیکي چې دغه چاودنه پر يوه هايلکس ډوله موټر شوې ده.

په رپوټ کې د پيښې په اړه ډير جزئيات نه دي ورکړل شوي او چارواکو هم په پيښه کې د مرګ ژوبلې ارقام په رسمي توګه نه دی تائيد کړی.

خو تر دغه رپوټ وروسته دویچه ویلې په دې اړه د جزيياتو د ترلاسه کولو په موخه د طالبانو د داخله وزارت له ویاند، سعيد خوستي، څخه د معلوماتو غوښتنه وکړه. خوستي وويل چې دغې چاودنې «کوم ځاني او مالي زیان» نه دی اړولی. هغه وویل چې دغه ماین د دارالامان سړک په یوه ګلدانۍ کې ځای پر ځای شوی وو.

له کله چې په اګست مياشت کې طالبان واک ته رسيدلي کابل ښار د په کراتو د چاودنو شاهد پاتې شوی دی.

شاوخوا درې اوونۍ مخکې په یوه ورته چاودنه کې د آریانا تلويزيون يو ځوان خبريال ووژل شو.

په کابل کې له دې پېښو تر ټولو خونړۍ یې د نومبر مياشتې په پیل کې، په کابل کې د سردار محمد داود خان پر روغتون يوه وسله واله حمله وه چې مسئوليت يې داعش ډلې منلی وو. د هغه وخت په رپوټونو کې ويل شوي وو چې په دغه حمله کې د طالبانو د يو لوړپوړي قوماندان په شمول نژدې شل تنه وژل شوي ول.