1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ
شخړي

طالبانو په غزني کي ۱۴ پوليس وژلي دي

۱۳۹۷ خرداد ۱, سه‌شنبه

د غزني د ولايتي شورا غړي وايي چي وسله والو طالبانو د دغه ولايت پر څو ولسواليو يرغل کړی او ۱۴ پوليس ئې وژلي دي. له څو ورځو راهيسي د غزني په بېلابېلو ولسواليو کي د وسله والو طالبانو يرغلونه زور اخيستی دئ.

https://p.dw.com/p/2y5QU
Afghanistan Sicherheitskräfte in der Provinz Ghazni
انځور: Imago/Xinhua

د غزني د ولايتي شورا غړي حسن رضا يوسفي، اسوشېتدپرس خبري آژانس ته ويلي دي چي پر ده يک ولسوالۍ باندي د وسله والو طالبانو په يرغل کي د امنيتي ځواکونو ۷ غړي وژل سوي دي. هغه زياته کړه چي په وژل سوو کي د يادي ولسوالۍ د امنيې قوماندان هم شامل دئ.

د ولايتي شورا دغه غړي زياته کړې ده چي د دې ولايت په جغتو ولسوالۍ کي هم ۷ پوليس وژل سوي دي.

يوسفي ويلي دي چي دغه يرغلونه چي په ده يک، جغتو، اجرستان او قره باغ ولسواليو کي د دوشنبې په ماښام پيل سوي دي تر نن سه شنبې پوري ادامه لري.

د غزني د ولايتي شورا رئيسې لطيفې اکبري تائيد کړې ده چي وسله والو طالبانو د ده يک او جغتو ولسواليو پر څو امنيتي پوستو يرغلونه کړي او امنيتي ځواکونه تر۲۰ زيات کسان تلفات لري.

د دغو بريدونو مسئوليت وسله والو طالبانو منلی دئ. د دغي ډلي وياند ذبيح الله مجاهد ادعا کړې ده چي د جغتو ولسوالۍ مرکز او د ده يک ولسوالي امنيتي پوستې ئې نيولي دي. خو ځايي چارواکو او د غزني د ولايتي شورا غړو د ولسوالۍ مرکز د سقوط خبره تائيد کړې نه ده.