طالبانو په ۴ ولایتونو کې د ښځو په ګډون ۲۹ کسان په درو وهلي
۱۴۰۴ شهریور ۲۰, پنجشنبه
د طالبانو سترې محکمې د پنجشبې (د سنبلې میاشتې ۲۰/ د سپټمبر ۱۱ نیټه) په ورځ اعلان وکړ چې د تخار ولایت په ینګي قلعه او خواجه بهاوالدین ولسوالیو کې د ابتدایي محکمو د پریکړو پر اساس ۱۱ کسان په درو وهل شويدي.
د طالبانو د محکمې د معلوماتو پر اساس، په تخار ولايت کې په مجموع کې ۷ سړي او ۴ ښځې د نا مشروع اړیکو او غلا په تور هر یو یې په ۳۹ درو وهل شوي دي.
د طالبانو سترې محکمې هر یو له دغو کسانو څخه له څلورو میاشتو تر درو کلونو پورې د بند په سزا هم محکوم کړي دي.
د طالبانو قضايي دستګاه تیره ورځ هم په لغمان ولایت کې پر یوې ښځې او یوه سړي، په بلخ ولایت کې پر یوې ښځې او یوه سړي او همدارنګه په کابل کې پر ۱۴ کسانو د په درو وهل کیدو حکم د عملي کولو خبر ورکړی و.
د طالبانو سترې محکمې ویلي چې په کابل کې ۱۴ تنه د مخدره موادو او مسکراتو سره د مبارزې د ابتدایي محکمې له خوا محکوم شوي وو.
بدني سزاګانې دوام لري
د ملګرو ملتونو او بشري حقونو سازمانونو پر نیوکو سربیره، په افغانستان کې د خلکو په عام محضر کې د طالبانو ادارې له خوا تقریباً په ورځني شکل بدني مجازات دوام لري.
نړیوالې ټولنې او د بشري حقونو فعالانو بې له مدافع وکیل او قانوني محاکمې ته له لاس رسي څخه د تورونو کسانو مجازات کیدل، په پرله پسې ډول غندلي دي، خو طالبان دغو انتقادونو ته پاملرنه نه کوي او په درو د وهلو سزاګانې یې جاري ساتلي دي.
طالبانو په ۲۰۲۱م کال کې واک ته له رسیدو راهیسې تر اوسه پورې په دغه هیواد کې لږ تر لږه په لسو مواردو کې د قصاص حکم هم عملي کړی دی.