امريکا: د سعودي وليعهد د خاشقجي وژنه منظور کړې وه
۱۳۹۹ اسفند ۹, شنبه
د امريکا متحده آیالاتو د ارزونې له مخې د سعودي عربستان وليعهد محمد بن سلمان د ژورناليست، جمال خاشقجي، مرګونی ماموريت پخپله منظور کړی دی. دغه خبره له هغه رپوټ څخه څرګندیږي چې د امريکا د استخباراتو د همغږې کوونکې، آوريل هاينس، دفتر په واشنګټن کې خپور کړی دی.
په دغه رپوټ کې ويل شوي چې وليعهد په ۲۰۱۷ کال کې «د دغه شاهي دولت د ټولو امنيتي او استخباراتي سازمانونو بشپړ کنترول» لرلی دی. له دې کبله «ډېر زيات غيراحتمالي» برېښي چې حکومتي استازو دې دغه ډول عمليات بې د هغه له اجازې تر سره کړی وي.
نور شواهد په دغه پېښه کې د بن سلمان د يوه نزدې مشاور ښکېلتيا او د هغه له خوا د داسې تدابيرو څخه ملاتړ دی چې له مخې يې په تبعيد کې مخالفين غلي کړل شوي دي.
پر ۷۶ سعوديانو د سفر بنديزونه
د امريکا متحده آيالاتو د سعودي عربستان پر ۷۶ اتباعو د سفر بنديزونه وضع کړل ځکه چې د امریکا د بهرنيو چارو د وزير، انتوني بلينکن، په خبره داسې انګېرل کيږي چې په «خارج کې د مخالفينو په ګواښلو کې» يې ونډه لرلې ده.
سربېره پر دې د متحده آيالاتو د ماليې وزارت د سعودي عربستان د استخباراتو پخوانی مرستيال، احمد العسيري او د دغه هیواد د چټک غبرګون د ځواک RIF غړي د بنديزونو په يوه ليست کې شامل کړل. العسيري له دې مخې د خاشقجي په وړاندې د مرګوني عمليات مشري کړې ده چې د RIF ځواک ډېرو غړو پکې هم ونډه لرله. د دغو کسانو شتمنۍ په متحده آيالاتو کې کنګل شوې دي او د امريکا اتباع نور نه شي کولی چې ورسره تجارت وکړي.
د بشري حقونو اهميت
د امريکا ولسمشر جو بايدن د پنجشنبې په ورځ لا د سعودي له پاچا سلمان سره تليفوني خبرې کړې وې. سپينې ماڼۍ ويلي چې ولسمشر په دې لړ کې «د ټولشموله بشري حقونو او د قانون پر حاکميت» باندې ټينګار وکړ چې د ده حکومت ورته ډېر اهميت ورکوي.
د هغه په خبره «پر فعالينو، مخالفينو او ژورناليستانو» بريدونه او ورته ګواښونه به د امريکا متحده آيالاتو له خوا ونه زغمل شي. خو په ورته وخت کې بايدن ډاډ هم ورکړ چې متحده آيالات د ايران پلوو ډلو له خوا د توغنديو د بريدونو له کبله د سعودي عربستان تر څنګ ولاړ دي.