د پولیو واکسین د تطبیق ممانعت؛ په غزني کې یو کوچنی فلج شو
۱۳۹۹ بهمن ۱۰, جمعه
په افغانستان کې د پولیو واکسین د کمپاین مسوولین وایي چې د پنجشنبې په ورځ (د جنورۍ ۲۸مه) په دغه هیواد کې د روان میلادي کال د پولیو لومړۍ پېښه ثبت شوې ده.
په افغانستان کې د پولیو د له منځه وړلو د عامه پوهاوي پروګرام مسوول میراجان راسخ، وایي چې د پولیو د واکسین ممانعت په غزني ولایت کې د یوه ۱۸ میاشتني ماشوم د فلجیدو سبب شوی دی.
هغه له دویچه ویله سره په خبرو کې وویل: «په دغه سیمه کې شا او خوا ۲۷ میاشتې کیږي چې کور په کور د پولیو د واکسین کمپاین نه دی تطبیق شوی، چې زیاتره ماشومان له واکسینيدو پاتې دي.»
میراجان راسخ خبرداری ورکوي که چیرې تر پنځه کلنۍ کم عمره ماشومانو ته د پولیو واکسین ور نه کړل شي، نو په روان میلادي کال کې به زیات ماشومان په ګوزڼ د اخته کیدو له خطر سره مخامخ وي.
یوازې په پاکستان او افغانستان کې د پولیو د پيښو رپوټونه ورکول کیږي او کابو په ټوله نړۍ کې دغه ویروس نه شته. په افغانستان کې نا امني او د طالبانو له لوري د واکسین د تطبیق ممانعت له دغه واکسین څخه د ماشومانو د محرومیت اصلي دلیل ګڼل کیږي.
د روان میلادي کال په لومړیو کې د واکسین د سرتاسري کمپاین په پیل کې، طالبانو د روغتیا د نړیوال سازمان او یونیسیف له استازو سره په لیدنه کې د پولیو له واکسیناسیون څخه خپل ملاتړ اعلان کړی وو.
خو پر دې سربیره هم راسخ وایي: «له بده مرغه په دې وروستیو کې کور په کور د پولیو واکسین د تطبیق په برخه کې ممانعت زیات شوی دی. د غزني، پکتیا او میدان وردک ولایتونه د واکسین له تطبیقه پاتې دي.»
د واکسین وروستی پنځه ورځنی کمپاین د تیرې جمعې په ورځ پای ته ورسید، خو راسخ وایي چې په دې دوره کې هم تر پنځه کلنۍ کښته څه کم درې نیم میلیونه ماشومان د ممانعت او مخالفت له کبله له واکسین پاتې شول.
له افغانستانه د یونیسیف د پولیو مسوول اخراج
د افغانستان د جمهوري ریاست مرستیال ویاند څو ورځې دمخه ویلي وو چې په افغانستان کې د یونیسیف د پولیو مسوول، محمد محمدي له افغانستانه اخراج شوی دی.
دوا خان مینه پال، د خپل ټویټر په یوه پیغام کې لیکلي وو چې د یونیسیف مسوول «په چارو کې د نه شفافیت او د افغانستان ولسمشر ته د بې اعتنایې په دلیل د ولسمشر د حکم پر اساس په ۲۴ ساعتونو کې له افغانستان څخه اخراج شو.»
د یونیسیف چارواکو په دې اړه کوم غبرګون نه دی ښوولی.
ش.ا.