په تهران کې د خامنهيي د جنازې لمونځ وشو
۱۴۰۵ تیر ۱۴, یکشنبه
په ایران کې د جګړې پر مهال د وژل شوي ستر مشر علي خامنهيي د جنازې لمونځ د یو لوړپوړي دیني عالم په امامت ادا شو.
د عامه ماتم د مراسمو په دویمه ورځ، ۹۷ کلن ستر آیتالله جعفر سبحاني د جنازې د لمانځه امامت وکړ، چې د ایران د دولتي ټلوېزیون په خپرو شویو انځورونو کې هم لیدل کېږي.
علي خامنهيي د فبرورۍ په ۲۸مه د ایران په پلازمېنه تهران کې د هغه پر رسمي دفتر د اسرائیلو په هوايي برید کې وژل شوی و.
له دې وروسته امریکا او اسرائیلو تر پنځو اوونیو زیات وخت له ایران سره جګړه وکړه، تر دې چې د اپرېل میاشتې په پیل کې د واشنګټن او تهران استازو د اوربند پر یوې موافقې هوکړه وکړه.
په مشهد کې به خاورو ته وسپارل شي
د خامنهيي جسد به د دوشنبې ورځې پورې په تهران کې پاتې وي. وروسته به د ایران په مذهبي ښار قم او په ګاونډي هېواد عراق کې به هم د درناوي مراسم ترسره شي. ټاکل شوې ده چې نوموړی به د پنجشنبې په ورځ په خپل پلرني ښار مشهد کې خاورو ته وسپارل شي.
د مجتبی خامنهيي د ګډون په اړه اوازې
په همدې حال کې په ایران کې دا اوازې هم روانې وې چې ښایي د خامنهيي زوی او ټاکل شوی ځایناستی مجتبی خامنهيي د لومړي ځل لپاره له خپلې ټاکنې وروسته په عامه مراسمو کې راڅرګند شي.
خو د ایراني رسنیو د راپورونو له مخې، د ۵۶ کلن مجتبی خامنهيي لپاره د جنازې د لمانځه د امامت کومه برنامه نه ده ټاکل شوې.
ویل کېږي چې په قم کې به د جنازې لمونځ آیتالله مکارم شیرازي (۹۹ کلن) او په مشهد کې به نوري همداني (۱۰۱ کلن) ادا کړي.