بدخشان؛ د سرو زرو په کان کې درې کسان مړه شوي
۱۴۰۳ شهریور ۳۰, جمعه
د افغانستان په بدخشان ولايت کې د سرو زرو کان یوې برخې نړېدو په پېښه کې درې کارګر مړه شوي دي. دا خبر باختر دولتي اژانس، چې اوس د طالبانو تر ادارې لاندې فعال دی، د بدخشان د ځايي سرچینو له قوله خپور کړی دی.
په خبر کې راغلي دي چې دغه درې کسان په خمبهار او دو درګي ولسوالیو کې د شګو په مینځلو بوخت وو، چې د کان یوه برخه پرې رانړېدلې ده او ځای پر ځای مړه شوي دي.
د افغانستان په مختلفو ولایتونو کې د سرو زرو، ډبرو سکرو او نورو قیمتي ډبرو کانونو د نړېدو په پېښو کې دا وړ مرګ، ژوبله وخت ناوخت د کان کارګرو ته اوړي.
اړوند: طالبان: د کانونو د څارنې لپاره دیني عالمان ګمارو
د شنونکو په باور، په افغانستان کې د کانونو غیرمسلکي او خپلسرې کیندنه، د وسایلو کمی او په دې برخه کې د پوهاوي نشتوالی ډېر کله د کانونو د کارګرو په مرګ او ژوبلې تمامېږي.
پر افغانستان د طالبانو له بیا واکمنېدو وروسته په شمالي ولایتونو کې د کانونو کیندنې ته پام ورزیات شوی او اوسني واکمن ورته د عوایدو د یوې مهمې سرچینې په توګه ګوري.