په کوټه کې یو بل ملا امام هم وژل شوی | آلمان او نړۍ | DW | 17.08.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

په کوټه کې یو بل ملا امام هم وژل شوی

د پاکستان پولیسو د شنبې په ورځ په کوټه کې د یوه بل ملا امام د وژل کیدو خبر هم ورکړی دی. تر دې مخکې په همدې ښار کې یوې چاودنې د طالبانو د ډلې د مشر ورور هم وژلی وو.

د کوچلک سیمې د پولیسو یوه افسر، چیرته چې دغه پیښه رامنځ ته شوې ده ویلي دي چې محمد اعظم، د یوه پلورنځای مخې ته په ډزو ویشتل شوی دی. د جمعې په ورځ هم په کوټه کې په یوه مسجد کې د ځای پر ځای شویو چاودیدونکو موادو د انفجار په پایله کې د ملا امام په ګډون څلور تنه ووژل شول او ۲۰ کسه نور ټپیان شول.

کوټه د بلوچستان ایالت پلازمینه ده چې په کې وخت ناوخت تاوتریخوالی رامنځ ته کیږي. په دې سیمه کې د اسلامپالو په ګډون، هغه بیلتون غوښتونکي هم فعاله دي چې د خپلې سیمې له پاره لا ډیر اختیارات او طبیعي زیرمو ته لا ډیر لاسرسی غواړي.

لا تر اوسه پورې کومې ډلې د وروستیو بریدونو پړه نه ده منلې. د جمعې ورځې په برید کې د افغان طالبانو د مشر ملا هیبت الله د ورور د وژل کیدو خبره هم شوې وه، خو طالبانو تر اوسه پورې دغه رپوټونه نه دي تائید کړي. کوچلک د طالبانو یو پټنځای بلل کیږي. د دغې ډلې ډیر غړي له همدې سیمې څخه افغانستان ته تګ راتګ کوي. پر دې سربیره ویل کیږي چې د طالبانو مشران هم په همدې سیمه کې سره غونډې کوي او د ټپي کیدو په صورت کې یې درملنه هم کیږي.