په کندهار کې ماین چاودنې او روزګان کې هوايي برید درانه تلفات اړولي دي | افغانستان | DW | 15.07.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

په کندهار کې ماین چاودنې او روزګان کې هوايي برید درانه تلفات اړولي دي

په کندهار ولایت کې د ۲۰۵ اتل قول اردو چارواکي وايي چې د دې ولایت په خاکریز ولسوالۍ کې د سړک غاړې یوې چاودنې ۱۱ ملکیان وژلي او لسګونه نور بیا ټپیان دي. په روزګان کې بیا هوايي برید د طالبانو په ګډون ګڼ شمیر ملکان وژلي دي.

په کندهار کې د ۲۰۵ اتل قول اردو قومندانۍ مطبوعاتي مسؤل دویچه ویله المان ږغ ته وویل چې دغه پېښه نن له غرمې وروسته د خاکریز ولسوالۍ د سلامۍ په سیمه کې د ملکي خلکو پرهغه مزدا ډوله موټر سوې، چي د شاه آغا زیارت ته د مېلې لپاره روان وو. په دې پیښه کې ۱۱ تنه وژل شوي او لسګونه نور ټپیان دي.

د یادې قول اردو ویاند وايي چې د سړک غاړي د ماین چاودنه په یاده پیښه کې ۱۱ ملکي وګړي وژل سوي او ۳۵ نور ټپیان دي.

تورن محمد صادق عیسی وویل: «دهیواد د دښمنانو لخوا د سړک پرغاړه یو کړۍ ښخ سوی ماین د ملکي خلکو پر مزدا موټر چاودلی دی، چی په دې چاودنه کي یوولس تنه وژل سوي او پنځه دیرش ټپیان دي. مړي او ټپیان زموږ د ملي اردو د سرتیرو لخوا په یاده ولسوالۍ کي نژدې کمپ ته لیږدول سوي دي.» نوموړی زیاتوي چې د وژل شوو او ټپیانو په ډله کې ښځي او ماشومان هم شامل دي.

په کندهار کې د بشري حقونو د خپلواک کمیسون، مدني فعالان، روڼ اندي او عام ولس د ملکي خلکو وژنه غندي او زیاتوي، چي د ملکي خلکو وژل د بخښلو نه دي. په کندهارکی د بشري حقونو فعال محمد صادق حقبین هم دغه خبره کوي او وايي، هرڅوک چې عام ولس وژني یوازې وحشت خپروي نور هیڅ نه دي.

خاکریز د کندهار ولایت او روزګان ترمنځ پرته ناامنه ولسوالي ده، چي په ځینو سیمو کي وسله وال طالبان فعال دي. تراوسه پورې د یادې پيښې په اړه چا څه نه دي ویلي خو د هیواد په جنوبي برخو او تر ډیره پورې په کندهار کې وسلوال طالبان پراخ حضور او فعالیت لري.

د اروزگان هوايي برید او اوښتي درانه تلفات

د کندهار سربیره د روزګان ولایت په ګیزاب ولسوالۍ کي د بهرنیو ځواکونو د هوايي بریدونو په پایله کي د ۱۶ ملیکانو او ۶ وسله وال طالبانو د وژل کیدو خبر ورکړل شوی دی. د روزګان د ولایتي شورا مرستیال نور محمد حقمل نن دویچه ویله آلمان ږغ ته وویل چې تیره شپه د ګیزاب ولسوالۍ د خلج په سیمه کی د شاه ګل کربلايي پر کور بهرنیو ځواکونو چاپه وهلې چې د وسلوالو طالبانو له برید سره مخ شوي دي.

حقمل زیاتوي چې سمدستی هوايي ځواکونه سیمي ته رسیدلي او په هوايي بمبار کي  ۱۶ ولسي وګړي او د وسله والو طالبانو د سیمه ییز قومندان ملا عبدالحکیم په ګډون ۶ طالب جنګیالي هم وژل سوي دي. د افغانستان په جنوب کې د مېشتو نړيوالو ځواکونو ویاند جوزیف پېټون د روزګان د پیښې په هکله وايي چې د روزګان په ګيزاب کې د تيري شپې په عملياتو کې دوی برخه نه لرله.

د روزګان پخواني والي امان الله تیموري بیا ځینو رسنیو ته ویلي، چي په دې برید کي ۳۵ ملکي وګړي وژل سوي دي، چي اکثره ددوی خپلوان دي. ویل کیږي چې د ګیزاب ولسوالۍ د خلج سیمه له تیرو څو کلونو راهیسي د وسله والو طالبانو په لاس کي ده. تراوسه دیادی پيښي په اړه د روزګان امنیتي مسؤلینو او وسله والو طالبانو څه نه دي ویلي.

ابراهیم سپیڅلی، کندهار

اعلان