طالبانو په هلمند کې تر ۳۳ ډیر امنیتي ځواکونه وژلي | افغانستان | DW | 25.03.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

طالبانو په هلمند کې تر ۳۳ ډیر امنیتي ځواکونه وژلي

ځايي چارواکو ویلي دي چې د طالبانو په یوه برید کې په هلمند کې تر ۳۳ ‌ډیر افغان سرتیري وژل شوي دي. پیښه د جمعې په ورځ په سنګین ولسوالۍ کې رامنځ ته شوې ده.

د هلمند د ولایتي شورا غړي عطاالله افغان، د دوشنبې په ورځ له اسوشیتد پرس خبري آژانس سره په خبرو کې دغه پیښه تایید کړې ده. طالبانو د شنبې په ورځ د برید پړه منلې ده. لا تر اوسه پورې افغان حکومت په دې اړه څه نه دي ویلي.

د ولایتي شورا یوه بل غړي محمد کریم اتل، بیا په پیښه کې د ۲۰ او ۳۰ امنیتي ځواکونو تر منځ وژل کیدو خبره کړې ده.

عبدالمجید اخندزاده، چې د هلمند د ولایتي شورا بل غړی دی بیا د ۴۰ او ۵۲ امنیتي ځواکونو د وژل کیدو خبره کړې ده.

د افغان پوځ ویاندې نواب شاه، ویلي دي چې دولتي جټ الوتکو د هغو ځواکونو مرسته کړې ده چې د طالبانو له برید سره مخامخ ول. هغه زیاته کړې ده چې هلمند ولایت ته اضافي سرتیري هم رسیدلي دي. د افغان پوځ دغه ویاند د تلفاتو په اړه څه نه دي ویلي.

طالبانو په وروستیو وختونو کې پر افغان امنیتي ځواکونو باندې خپلو بریدونو ته زور ورکړی دی.

نزدې یوه اوونۍ مخکې طالبانو د هلمند ولایت په بیلابیلو سیمو کې پر امنیتي ځواکونو باندې بریدونه وکړل. د ولایتي شورا غړي میزا محمد علیزاده ویلي دي چې طالبانو نوي بریدونه په دې ولایت کې د افغان ځانګړو ځواکونو د عملیاتو په ځواب کې ترسره کړي دي.

ms/nz (AP,DPA)

اعلان