Фотографија на денот: Ураганот „Дориан“ носи пустош и страв
2 септември 2019Првите телевизиски снимки од островската група Бахами покажуваат пустош - однесени покриви на куќите, откорнати дрвја и драматични поплави. Ова е најсилниот ураган кој ја погодил островската држава со околу 400.000 жители во последните стотина години, тој прерасна во петта категорија.
Во американските сојузни држави на источниот брег е издадено предупредување поради ураганот, а во Јужна Каролина наредба за евакуација на 800.000 луѓе.
Жителите на Флорида уште треперат и не знаат дали ураганот ќе го промени правецот и ќе ги одмине или ќе ослабее. Но најважно е да се задржи оптимизмот. Така во една пекарница во Холивуд бич, недалеку од Мајами, решиле да го направат „Дориан“ во форма на торта - на нашата #ФотографијаНаДенот. Така делува помалку опасно, и е повкусен.