Три жртви во напад на фестивал во Калифорнија

Полицијата досега ја потврди смртта на три лица на фестивалот на лукот во Гилрој. Уште најмалку 12 лица се ранети, од кои неколкумина се во болница во критична состојба.
Шефот на полицијата Скот Смити изјави дека осомничениот напаѓач бил застрелан, додека сведоци на настанот тврдат дека тој имал и соучесник по кој се уште се трага. Целиот регион, во радиус од 48 километри се смета за „активно место на злосторство“. Според Смити, осомничениот ја пресекол оградата околу местото каде се одржувал фестивалот и успеал да влезе на него. Сведоците велат дека напаѓачот бил белец на возраст од околу 30 години. Откако се вмешал меѓу масата, тој почнал неселективно да пука. Снимките на американските телевизии покажуваат луѓе кои панично бегаат на фестивалот.

„Го видов како пука во сите правци. Не целеше кон никој посебно. Едноставно пукаше од лево кон десно, и од десно кон лево“, изјави еден очевидец.
Американскиот претседател Доналд Трамп утрово твитна поддршка за луѓето на фестивалот. „Органите на редот се на местото на пукањето во Гилрој, Калифорнија. Според извештаите, пукачот се уште не е совладан. Бидете претпазливи и сигурни“, напиша тој.

Фестивалот на лукот во Гилрој е еден од најголемите фестивали на храна во САД кој привлекува и до 100 илјади гости.