Софтвер-пионерот Мекафи пронајден мртов во затвор

Шпанското министерство за правосудство во куса изјава соопшти дека сето укажува на тоа оти се работи за самоубиство. Неговиот адвокат Хавиер Вилаба за Ројтерс изјави дека сите работи укажуваат дека се обесил.

Веста за пронаоѓањето на телото стигна само неколку часа откако Шпанија одобри негова екстрадиција во САД, каде му се закануваа 30 години затвор за затајување данок. Мекафи беше уапсен минатата година во Шпанија и оттогаш се наоѓаше во затворот во близина на Барселона.

Тој беше уапсен ден откако американското јавно обвинителство објави дека е поднесено обвинување против него бидејќи не пријавил милиони долари приход од промоција на криптовалути, консултантски услуги, конференции и од правата за снимање документарен филм за неговиот живот.

Повеќе: Американските милијардери речиси и да не плаќаат данок на доход

Според обвинението од јуни минатата година, Мекафи не плаќал данок меѓу 2014 и 2018 година, а приходите му биле исплаќани на банкарски сметки и во криптовалути на имиња на други лица за да избегне да плати данок. Истражителите, според медиумите, го поврзале Мекафи со десет случаи на избегнување на плаќање данок и исто толку случаи во кои на инвеститорите во криптовалути им ветувал профит, а се проценува дека така заработил 23 милиони долари.

Американските власти преку Интерпол издадоа налог за апсење и побараа негова екстрадиција. Мекафи беше пионер на ативирусни софтвери.