Трамп стравува од 100 илјади починати во САД

Американскиот претседател Доналд Трамп целосно го промени ставот кон коронавирусот, продолжувајќи ја вонредната состојба во САД за уште еден месец, но и истакна дека пикот од епидемијата дури претстои. Со тоа, по низа потези кои покажуваа донекаде лежерен став, го прифати мислењето на бројни здравстени стручњаци и на научната заедница.

Во обраќањето, Трамп истакна дека ќе „биде добро“ ако неговата администрација успее да го задржи бројот на починати од Ковид-19 до 100.000, што е неверојатен пресврт во однос на неговите поранешни оптимистички предвидувања, во рамки на кои рече и оти се надева на повторно придвижување на економијата на земјата до Велигден.

Воедно, американскиот претседател ги нападна новинарите, но изнесе и огнени обвинувања дека здравствените работници крадат маски, иако за тоа не приложи ниту еден доказ.

Повеќе:

-Пандемија во Њујорк: „Ќе имаме тела по улиците доколку вака продолжи“

-САД ја надминаа Кина: Најголем број инфицирани од коронавирусот

-Пропагандна војна помеѓу Кина и САД: Чиј е коронавирусот?

 

Трамп најави дека периодот од 15 дена социјално дистанцирање кое го побара федералната влада, а кое треба да истече, ќе биде продолжено до 30 април, и изрази надеж оти земјата ќе може да се врати во нормала до 1 јуни.

ФДА: Лекот за маларија може да се користи за лечење од Ковид-19

Во меѓувреме Американската сојузна агенција за лекови (ФДА) одобри примена на хлорокин и хидроксихлорокин за лечење на заболените од коронавирусот во болнички услови. ФДА вчера даде зелено светло оваа терапија да се препише на пациентите заболени од Ковид-19, „кога клиничките испитувања не се достапни или не е изводливо“. Американскиот претседател Трамп на 24 март позитивно зборуваше за оваа терапија во борба против коронавирусот.

Контроверзниот француски лекар, професор Дидие Раул, кај заболените од Ковид-19 се залага за примена на хлорокин и хидроксихлорокин, антималариски лек кој се користи и кај ревматскиот артритис и лупус.

Повеќе:

-Нигеријците во редици по лекот кој Трамп го препорача против коронавирус

-Филипче најави нова терапија за коронавирус- какви се светските искуства?

Студиите кои ги спроведува професорот Раул, како што наведува новинската агенција Франс Прес не ја увериле пошироката научна заедница. ФДА предупреди и дека заболените не би смееле да земаат лекови на своја рака. Лечењето според протоколот на професорот Раул, со хидроксихлорокин и со антибиотикот азитромицин наскоро ќе се спроведе во Њујорк. Во САД има над 143.000 заболени и преку 2.500 починати од Ковид-19.