Какви желби и планови имаат Германците за 2020 година
2020 е на прагот, а што се наоѓа на врвот на листата на желби и добри намери на Германците? Репрезентативна анкета ги покажува годинешните резултати.
1. Избегнување на стресот
64 проценти од Германците сакаат поголемо релаксирање, покажува анкетата на здравственото осигурување ДАК. Наместо за ова да ви нудиме вообичаена фотографија на стрес, на пример некој како се бори со планина нерешени предмети и проблеми, ви нудиме ваква глетка - слатко мало маче.
2. Повеќе време за семејството и пријателите
Божик, Нова година, е време кое исто така е поврзано со стрес, подготовка на празнично јадење, купување подароци, завршување на итни работи. Но, тоа е и време на засилени социјални контакти, а 64 проценти од Германците и за 2020 година планираат да поминат повеќе време со семејството и пријателите.
3. Живот во духот на заштитата на природата
Грета Тунберг со штрајкот на учениците и демонстрациите „Петоци за иднината“ ги натера Германците да го сменат мислењето. Додека екологијата и заштитата на климата лани не беа ниту во 12 нивни најважни цели, сега преку 60 проценти од испитаниците планираат во 2020 година да живеат со поголема еколошка свест.
4. Поголема активност, повеќе спорт
Светска класика: во Германија 56 проценти од анкетираните навеле намера во 2020 година повеќе да се движат. За жал, на традицијата на добри намери тука се надоврзува традицијата на брзо туркање на планот настрана, барем до другиот крај на годината. Сепак, 54 проценти успеваат својата намера да ја реализираат барем во првите четири месеци.
5. Наоѓање време за себе
Поголема радост отколку намерата во зима да се џогира нуди следното - мислете едноставно дека сте на некоја плажа, морето се бранува пред вас, а вие не треба да правите ништо друго освен да се посветите на себе (што патем е доволно тешка работа). 53% од Германците се надеваат во 2020 година да имаат нешто повеќе време за себе.
6. Здрава исхрана
Помалку маснотии, редуцирање на јагленохидратите, вегетаријанска, веганска, биолошка или сурова храна - трендовите во исхраната се разновидни. Притоа, навиките во јадењето можете да ги подобрите и без диета. Погрижете се едноставно во чинијата да ставите свежи продукти во силни бои. 53 проценти од Германците планираат во 2020 година да се хранат поздраво.
7. Слабеење
Уште една класична цел: колку здравата храна и спортот да можат да придонесат за тоа, 36 проценти од испитаниците сакаат и дополнително да ја намалат тежината. Во тоа е од помош водење дневник и нотирање во стилот: „Прв ден: ги исфрлив маснотиите, слатките и штетни по здравје јадења од менито. Толку е кул и толку сум горд на себе!“
8. Штедење
Штедливоста на Германците е легендарна. Сепак, податоците на ОЕЦД покажуваат дека Холанѓаните, Данците, Швеѓаните, Швајцарците и Норвежаните се уште поштедливи. Речиси една третина од Германците (31 процент) сака и во 2020 година од своите примања да стави нешто настрана.
9. Поминување помалку време на интернет
Сурфањето на интернет, според научниците, го има истото дејство како и супстанциите кои предизвикуваат зависност, првенствено преку фидбекот од социјалните медиуми. 27 проценти од Германците планираат во наредните 12 месеци нивниот смартфон почесто да мирува. Кај старосната група меѓу 14 и 29 години намерата е уште пошироко распространета - дури 47 проценти сакаат почесто да бидат офлајн.
10. Помалку гледање телевизија
Со часови „закованост“ пред екранот и постојано менување ТВ-канали: сигурно многумина се препознаваат во ваква слика. Свесно почесто откажување од телевизорот е она што имаат намера 19 проценти од испитаниците. Со тоа се заштедуваат и пари, ако се имаат предвид претплатите за различни телевизиски понудувачи.
11. Помалку пиење алкохол
Германците се „заљубени“ во пиво - во ова клише секако има и вистина, зашто по Чешка, Намибија и Австрија, Германија е четврта земја според конзумирање пиво. Но, 15 проценти од германските граѓани сакаат во 2020 година да пијат помалку алкохол, останува да видиме дали тоа ќе се одрази врз потрошувачката на пиво или се однесува само на љубителите на вино.
12. Откажување од цигари
Без оглед на сите познати здравствени ризици, пуши речиси секој четврт Германец. Само 11 проценти од анкетираните навеле дека имаат намера во 2020 година да престанат да пушат, исто како и минатата година. Меѓутоа, студиите покажуваат дека трајното откажување од цигари спаѓа во најмалку одржуваните намери. Значи, повторна желба за 2020 - доста со пушење!