И руските нуклеарки загрозени од пожарите

„Вонредна состојба е прогласена во шумите и парковите во околината на градот Озерск поради опасноста од пожарите“, соопштија локалните власти на нивната интернет-страница. Тревогата е само една од бројните опасности кои загрозуваат повеќе витални и стратешки објекти во Русија. Досега беа тешко оштетени и повеќе воени објекти, а под закана се и други атомски централи.

Властите во Москва, пак, денеска признаа дека е удвоена смртноста во главниот град, каде веќе две недели состојбата е критична поради огромните жештини, чадот и смогот од пожарите во околината.

„Во нормални услови во Москва умираат околу 360 луѓе дневно, а во моментот околу 700. Морталитетот е двојно зголемен“, соопшти шефот на московскиот комитет за здравје Андреј Сељцовскиј. Досега руските власти немаат објавено официјална бројка на жртвите од отровниот чад и смогот во главниот град.

Масовно се бега од Москва

Германија денеска најави дека во Москва испраќа 100.000 заштитни маски, за превенција на населението од отровниот чад. За многу граѓани движењето низ градот е можно само со маски, но од пред неколку денови тие веќе не можат да се купат. Се проценува дека најмалку сто илјади московјани го напуштиле градот, а илјадници други се подготвуваат да го сторат истото.

Ширум Русија горат околу 200.000 хектари површина. На гасењето на пожарите ангажирани се преку 160 илјади луѓе, помогнати од 60-ина илјади возила, и 40 авиони и хеликоптери. Досега во пожарите загинаа најмалку 52 лица.

Министерот за вонредни ситуации Сергеј Шојгу оцени дека до крајот на неделава треба да бидат изгаснати пожарите во Подмосковието, каде исто така е прогласена вонредна состојба.

автор: БГ/афп/дв

редактор: Трајче Тосев