Германија: 100 милијарди евра помали приходи од даноците
14 мај 2020
Според проценката на даночните експерти објавена од министерството за финансии, сојузните, покраинските и локалните власти годинава ќе реализираат 717,8 милијарди евра од даноци, што е далеку помалку од собраните 799,3 милијарди во 2019 година. Прогнозата за годинава беше дека даноците ќе донесат 816,4 милијарди евра во буџетската каса. Проценките предвидуваат дека следната година преку даноци ќе се соберат 792,5 милијарди евра, и 816 милијарди во 2022 година.
Германската влада годинава за првпат го напушти принципот на балансиран буџет и се задолжи со 156 милијарди евра за да го финансира пакетот за спас на стопанството и да го покрие минусот од даноците.
Севкупно, германската влада одобри над 1,000 милијарди евра како помош преку различни пакети, кои предвидуваат средства за мали компании и индивидуални бизнисмени, но и капитал за големите компании.
Германскиот министер за финансии Олаф Шолц, кој ја карактеризираше кризата како „природна катастрофа“, најави дека владата планира и стимулативен пакет на почетокот на јуни. Шолц се надева дека мерките ќе придонесат за модернизација на економијата и на дигиталната инфраструктура во земјата, како и за битка со климатските промени.