Смртоносен земјотрес во северозападна Кина
19 декември 2023
Најмалку 118 лица загинаа, а повеќе од 500 се повредени во земјотресот што го погоди регионот на границата меѓу кинеските провинции Гансу и Кингхаи, објавија вчера кинеските државни медиуми.
Европскиот медитерански сеизмолошки центар (ЕМСЦ) процени дека земјотресот во регионот бил со јачина од 6,1 степени.
Земјотресот бил на длабочина од 35 километри со епицентар 102 километри западно-југозападно од Ланжу, Кина, соопшти ЕМСЦ. Според државната новинска агенција Шинхуа, земјотресот, кој се случил околу полноќ, имал интензитет од 6,2 степени.
Најголема штета е забележана во округот Џишишан во регионот Гансу во земјата, на околу 100 километри југозападно од мегаградот Ланжу - земјотресот се почувствувал и таму. Погодени се и делови од соседниот регион Кингхаи.
Според извештаите, во потресот се урнале куќи изгради, а бројни патиштата се оштетени. На неколку места снемало струја, а водоснабдувањето било прекинато. Многу луѓе, ја минаа вечерта на отворено на голем студ и температури под нула Целзиусови степени. Според локалната метеоролошка агенција, минималната температура во Џишишан се очекува денеска да достигне минус 10 степени.
Кинеската Национална служба за спречување на катастрофи и помош и Министерството за управување со вонредни состојби ја активираа итната помош на 4-то ниво, соопшти Шинхуа.
Спасувачки тимови се испратени во областите погодени од земјотресот каде што се борат со многу ниски температури и замрзнатиот терен во потрага по преживеани.
Кинескиот државен и партиски лидер Ши Џинпинг повика да се направи сѐ за да се спасат луѓето во погодениот регион.