СДСМ стравува од бегство на Груевски во Русија и Белорусија

По политичките промени во Унгарија и формирањето нова влада, и најавите дека тројца политичари, меѓу кои и поранешниот македонски премиер Никола Груевски, ќе треба да ја напуштат земјата, опозициската СДСМ предупредува на ризик од негово ново бегство, овојпат кон Русија или Белорусија.

Идниот унгарски премиер Петер Маѓар најави дека Унгарија ќе престане да биде засолниште за политичари бегалци. Тој посочи дека станува збор за Никола Груевски, но и за полските политичари Збигњев Жиобро и Марчин Романовски.

На меѓународна прес-конференција одржана во понеделникот (13 април 2026 година), Маѓар одговори на прашање од полската телевизија ТВН, најавувајќи дека неговата идна влада ќе ги екстрадира Романовски и Жиобро во Полска.

„Предлагам да престанат да одат во Икеа и да купуваат мебел, бидејќи нема да бидат тука долго. Унгарија не е депонија за меѓународно барани криминалци“, изјави Маѓар, кој експлицитно го спомена и Никола Груевски.

СДСМ: Мицкоски не поднесува барање за екстрадиција

Од СДСМ велат дека Полска веќе реагирала и испратила официјално барање за екстрадиција, додека Владата предводена од Христијан Мицкоски, според нив, сѐ уште нема поднесено такво барање за Никола Груевски.

„Според нашите информации, Груевски нема да добие азил во Турција, но преговара за заминување во Русија или Белорусија. Прашање е каква цена ќе плати Македонија за тоа бегство“, велат од СДСМ.

Партијата оценува дека постои реален ризик Груевски повторно да му побегне на правосудниот систем и правдата, поради институционално одолговлекување и политички калкулации.

Документацијата сè уште се комплетира

Од Министерството за правда информираа дека се испратени дописи до сите надлежни институции за собирање на неопходната документација поврзана со пресудите и судските постапки против Груевски. Обновеното барање за екстрадиција ќе биде испратено откако документацијата целосно ќе се комплетира.

Премиерот Христијан Мицкоски изјави дека доколку Никола Груевски се појави во Македонија, правосудните органи ќе постапат согласноправосилната судска пресуда.

„Барањето за екстрадиција беше поднесено уште во 2018 година, но беше одбиено во 2019 година затоа што Груевски доби азил. Постојат јасни процедури кога станува збор за лице со одобрен азил“, рече Мицкоски.

Тој додаде дека државата има обврска да постапува согласно законите, но дека нема очекувања околу евентуално враќање на Груевски во земјата.

Последното официјално барање за екстрадиција на Никола Груевски било поднесено во 2019 година за сите предмети за кои е распишана меѓународна потерница. Барањето било одбиено од унгарските власти со образложение дека на Груевски му е доделен азил и дека, согласно унгарското законодавство, не може да биде екстрадиран во државата од која побегнал.

Поранешни министри за правда во изминатите години во повеќе наврати најавуваа дека кога ќе се создадат услови, повторно ќе биде побарана екстрадиција.