ЕУ одобри 65,7 милиони евра за С. Македонија

Северна Македонија добива 65,7 милиони евра од Европската комисија во рамки на Инструментот за реформи и раст, по позитивната оцена за спроведените реформи во образованието и дигитализацијата.

Средствата се одобрени по третото барање за исплата, при што Брисел ги оценил мерките за подобрување на финансирањето на основното и средното образование, како и за проширување на пристапот до дигитална инфраструктура и ИТ-опрема во училиштата.

Од вкупниот износ, 30,6 милиони евра ќе бидат префрлени директно во државниот буџет, додека останатите средства ќе бидат наменети за инвестиции преку Инвестициската рамка за Западен Балкан (WBIF), по нивно официјално одобрување.

Со оваа исплата, вкупната финансиска поддршка за Северна Македонија во рамки на овој инструмент достигнува 142,1 милион евра.

Средства за реформи и инфраструктура

Делот од средствата што ќе се реализира преку WBIF ќе биде насочен кон проекти во одржлив транспорт, чиста енергија, дигитализација и развој на човечки капитал. Проектите ќе се спроведуваат во соработка со партнерите од Западен Балкан и меѓународни финансиски институции. 

Првиот заменик претседател на Владата и министер за европски прашања, Беким Сали, ја поздрави одлуката на Европската комисија, истакнувајќи дека ова претставува важен сигнал на доверба и признание за реформската агенда на државата.

Инструментот за реформи и раст е дел од Планот за раст на Европската унија за Западен Балкан, чија цел е постепено интегрирање на земјите од регионот во Единствениот пазар на ЕУ, пред официјалното членство.

Планот за раст, усвоен во 2023 година, предвидува забрзување на економската соработка, поддршка на реформите и зголемување на финансиската помош за земјите кандидати. Финансискиот инструмент располага со вкупно 6 милијарди евра, а земјите на секои шест месеци поднесуваат извештаи за напредокот.

Последната исплата се однесува на реформите реализирани до крајот на декември 2025 година. Од 2024 година досега, преку овој инструмент се исплатени вкупно 673,6 милиони евра.

Инвестициската рамка за Западен Балкан игра клучна улога во имплементацијата на Планот, со распределба на околу 3 милијарди евра за приоритетни проекти во енергетиката, транспортот, дигитализацијата и човечкиот капитал, како дел од стратегијата „Глобална порта“ на ЕУ.