Неколку повредени во железничка несреќа во Данска
23 април 2026
Во железничка несреќа во Данска се повредени најмалку 17 лица. Меѓу населените места Хилерод и Кагеруп, околу 40 километри северно од главниот град Копенхаген, во четвртокот наутро „се судриле два воза“, соопшти полицијата. Според медиумски извештаи, повредени се 17 лица, од кои четворица тешко.
Според податоците на службите за итна помош, итниот повик бил примен во 06:30 часот. „Станува збор за фронтален судир“, изјави портпаролот на полицијата Тим Симонсен за новинската агенција АФП. Сите патници биле евакуирани од возот, меѓу нив и повредените.
Во судирот двата воза се тешко оштетени. Кабините на двете локомотиви биле деформирани од ударот, а прозорците на предните делови од возовите се скршиле.
„Длабоко сум потресена и шокирана, моите мисли се со сите што се погодени“, изјави Трине Егетвед, градоначалничката на општината Грибсков, која се наоѓа во близина на местото на несреќата. Полицијата и службите за итна помош биле во голем број на терен. Ќе следи истрага „што точно се случило и ќе се обезбеди секој да ја добие помошта што му е потребна“, соопштија од полицијата.
Железничките несреќи во Данска се релативно ретки. Сепак, во 2019 година во несреќа со патнички воз животот го загубија осум лица.