Герлиц: Трка со времето – потрага по исчезнатите лица

Спасувачката операција по уривањето на станбена зграда во германскиот град Герлиц се одвива во услови на голема неизвесност и претставува вистинска трка со времето. Сè уште се трага по три лица за кои се верува дека се затрупани под урнатините, при што спасувачките служби проценуваат дека шансите за преживување можат да изнесуваат до 72 часа.

„Сè уште станува збор за потрага по исчезнати лица, а не за извлекување на тела“, изјави портпарол на полицијата доцна изутрина, нагласувајќи дека надеж постои, иако таа постепено се намалува.

Потрагата се изведува рачно, кучињата повеќе не сигнализираат животни знаци

Во потрагата беа вклучени и специјално обучени спасувачки кучиња. Командантот на противпожарната единица во Герлиц, Ремо Келч, објасни дека животните претходно реагирале на знаци на живот под урнатините, но дека во текот на денот повеќе не давале такви сигнали.

Спасувачите внимателно се пробиваат низ натрупаните рушевини користејќи лопати и голи раце. Употребата на тешка механизација, како багери, намерно е ограничена поради ризикот дополнително да се загрозат евентуално преживеаните под урнатините. Дополнителна опасност претставува гасот, кој сè уште може да се задржува во празните простори меѓу рушевините.

Исчезнати се две млади туристки и еден маж

Зградата се урнала во понеделник во доцните попладневни часови. Според официјалните информации, исчезнати се две туристки од Романија, на возраст од 25 и 26 години, како и 48-годишен маж со бугарско и германско државјанство, кој престојувал во Герлиц,  Германија  поради работа.

Две од првично пријавените пет исчезнати лица биле пронајдени кратко по полноќ — станува збор за посетители кои во моментот на несреќата сè уште биле на пат. Во објектот имало комбинација од станови за изнајмување и туристички апартмани.

Целата улица во близина на железничката станица, е целосно блокирана. На терен се распоредени бројни возила на Техничката служба за помош и противпожарната служба. Паркираните автомобили во близина се покриени со слој прав поради уривањето.

Еден багер со долг хидрауличен крак внимателно ги отстранува поголемите делови од урнатините, додека спасувачките екипи продолжуваат со рачна работа, метар по метар расчистувајќи го теренот.

Сомнежи за експлозија на гас, опасноста сè уште постои

Точната причина за несреќата сè уште не е утврдена, но според градоначалникот на Герлиц, Октавијан Урсу, постои основано сомнение дека станува збор за експлозија на гас.

„Тоа беше долга и исклучително тешка ноќ. Спасувањето човечки животи е апсолутен приоритет“, изјави Урсу, додавајќи дека на терен биле ангажирани околу 140 спасувачи, со поддршка и од соседна Полска.

Според полицијата, гас и натаму истекува и во вторник наутро, што претставува сериозен ризик за спасувачите. Во текот на ноќта биле ангажирани пет кучиња-спасувачи, кои успевале да влезат и во најмали отвори меѓу рушевините. Мисијата ќе продолжи најмалку во текот на целиот ден, а доколку биде потребно — и во текот на ноќта.

Очевидци сведочат за силна експлозија

Жителите од околните згради опишуваат драматични сцени за време на уривањето. Една станарка изјавила дека експлозијата наликувала на детонација на бомба и дека густ чад навлегол во нејзиниот стан преку отворен балконски прозорец.

Друг сведок за локалните медиуми изјавил дека слушнал силен удар проследен со силна потрес. „Инстинктивно се сокрив под маса и веднаш повикав итна помош“, рекол тој, додавајќи дека однадвор слушал вресоци.

Трет очевидец изјавил дека ударот бил толку силен што мислел дека и неговата зграда ќе се урне.

Од вкупно 54 евакуирани лица, четири се привремено сместени во објект во сопственост на градот.