Елферсберг: Селото кое слета на Месечината

Елферсберг не е име што обично се слуша во европскиот фудбал. Станува збор за мало место со едвај 7.000 жители, без железничка станица и со само неколку локални продавници. Но токму од таа речиси незабележлива точка на мапата дојде една од најголемите сензации во германскиот спорт – клуб што со години беше далеку од врвот денес е дел од Бундеслигата.

Елферсберг е мало место североисточно од Сарбрикен. Дел е од општината Шпизен-Елферсберг, која има околу 13.000 жители, додека самото Елферсберг брои околу 7.000 луѓе. Во местото нема железничка станица, а функционираат само три пекари.

Фудбалскиот клуб е основан во 1907 година. Привремено бил згаснат за време на Првата светска војна, а повторно е формиран во 1918 година. Во 2013 година клубот стигна до третата лига заедно со Лајпциг, но веднаш испадна. По два неуспешни баражи во 2016 и 2017 година, враќањето во третата лига се случи дури во 2022 година, по што започна неговиот брз подем и раст на репутацијата.

Тоа се совпадна со доаѓањето на Нилс-Оле Бок во 2017 година, а една година подоцна и на тренерот Хорст Штефен, поранешен играч во Бундеслигата. Бок прво работеше како скаут, а потоа како спортски директор и одигра клучна улога во ангажирањето играчи. Штефен со тимот обезбеди два последователни пласмани во повисок ранг, по што во 2023 година Елферсберг влезе во Втората Бундеслига.  

На тој пат важна улога имаше германскиот репрезентативен напаѓач Ник Волтемаде (сега играч на Њукасл), додека фудбалерот на Бајерн, Паул Ванер, една година подоцна одигра многу успешна позајмица.

Пат кон елитата и стабилност во управувањето

Веќе во втората сезона во втората Бундеслига, Елферсберг играше бараж за влез во Бундеслигата, но драматично беше елиминиран со погодок на Хајденхајм во 95. минута. Потоа клубот остана без тренерот Штефен (Вердер Бремен), а неколку клучни играчи заминаа, меѓу нив и Фисник Аслани, кој се врати во Хофенхајм. Се чинеше дека следува борба за опстанок.

Сепак, континуитетот во раководството се покажа како пресуден. Клубот го водат Франк Холцер, претседател на надзорниот одбор, и неговиот син Доминик, претседател на клубот, кои стојат и зад компанијата „Урсафарм“, главен спонзор.

Доаѓањето на тренерот Винсент Вагнер од вториот тим на Хофенхајм се покажа како вистински потег. Тој го задржа постоечкиот систем и дополнително го надгради. Во стручниот штаб клучна улога имаа помошниот тренер Мајк Франц, поранешен бундеслигаш, како и менаџерката на тимот Селина Вагнер, освојувачка на Лигата на шампиони со Волфсбург. 

И покрај заминувањето на важни фигури – напаѓачот Јунес Ебнуталиб (Ајнтрахт Франкфурт) и спортскиот директор Бок (Борусија Дортмунд) – тимот остана стабилен. По пораз во претпоследното коло, ситуацијата се усложни, но благодарение на подобрата гол-разлика, победата во последното коло беше доволна за второто место и историски влез во Бундеслигата.

„Еден пријател ми рече: ‘Ако Елферсберг влезе во Бундеслигата, тоа е како да слета на Месечината.’ Денес слетавме на Месечината“, изјави тренерот Вагнер.

Млад состав, мал буџет и јасна стратегија

Елферсберг своите натпревари ги игра на стадионот „Валдштадион ан дер Кајзерлинде“, кој има капацитет од 10.000 гледачи – повеќе од бројот на жители во местото. Работите за проширување на капацитетот на 15.000 места, колку што бара Бундеслигата, треба да завршат до 2027 година.

Клучни играчи се играчот од средниот ред Бамбасе Конте (на позајмица од Хофенхајм), голманот Николас Кристоф, како и крилниот напаѓач Лукас Петков со 13 голови и седум асистенции. Офанзивецот Давид Моква, доведен во јануари за 1,5 милиони евра, дополнително го засили тимот.

Просечната возраст на екипата изнесува 25,3 години, што ја прави една од помладите во втората Бундеслига. Клубот наводно заработил околу 10 милиони евра од трансфери, а потрошил само три милиони за засилувања, што ја потврдува стратегијата на рационално работење.

Во текот на летото ќе се види како клубот ќе го состави тимот способен за опстанок во Бундеслигата.