Црвенковски поголем оптимист за НАТО од Месиќ | Северна Македонија | DW | 24.10.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Црвенковски поголем оптимист за НАТО од Месиќ

Хрватскиот претседател, Стипе Месиќ, е во посета на Македонија.

Стипе Месиќ

Стипе Месиќ

Хрватска и Македонија со кандидатски статус за членство во ЕУ и можно членство во НАТО, сепак имаат различни стартни позиции и шанси. Официјален Загреб е со јасна поддршка од Вашингтон, особено по средбата Буш – Санадер. Властите во Скопје очекуваат дека хрватската локомотива би можела да го повлече и македонскиот вагон, или барем тој да не остане на слеп колосек. Затоа хрватско-македонските односи денеска во Скопје ги анализираа еден од последните функционери во југо-федерацијата, Стипе Месиќ и тогаш младиот и штотуку влезен во македонската политика, Бранко Црвенковски, денеска и двајцата во улога на претседатели на самостојни држави. Ветеранот Месиќ не пропушти да ги потенцира добрите страни од 40 годишната соработка меѓу Македонија и Хрватска во југо-федерацијата:

“Македонската страна говореше на македонски, хрватската страна говореше на хрватски, но одлично се разбравме. “

Месиќ и Црвенковски потпишаа заедничка изјава каде последни точки се меѓусебните поддршки за НАТО и ЕУ. Хрватскиот претседател одбегна да ги постави интересите за НАТО и ЕУ со заеднички влез. Тој за регионот говореше со општа фраза:

“Освен што нашите добри односи се вредност сама по себе, тие се значајни и за квалитетот на политичките односи во поширокиот регион“.

Македонскиот претседател, Црвенковски, е далеку поголем оптимист за членството во НАТО од неговиот колега Месиќ:

“Сосема е извесно дека Вашингтон стои на позициите дека следниот круг на проширување на алијансата ќе се случи во 2008 година. Тоа е она што и ние го посакуваме. Причина е што Хрватска, заедно со Македонија и Албанија припаѓа на Јадранската група. Да се потсетиме дека Јадранската повелба беше спонзорирана токму од САД. “

Гостинот од Загреб, Стипе Месиќ, говореше во македонскиот парламент. Таква шанса не му беше дадена на екс-македонскиот претседател Борис Трајковски пред три години, иако тој самиот побарал да говори пред хрватскиот Сабор.

Реклама