„Монсанто“ треба да плати милиони долари на заболен од рак

Судска порота во судот во Сан Франциско смета дека хемиското-средство Roundup, производ на „Монсанто“, значително придонесло за појавата на рак кај тужителот Дивејн Џонсон, па аграрниот концерн треба да исплати отштета од околу 289 милиони долари на неизлечиво болниот поранешен хаусмајстор. Кај него е дијагностициран рак на лимфните жлезди, а за тоа, според судот, се одговорни хербицидите на „Монсанто“. 

Поротата сметаше дека „Монсанто“ пропуштил да ги предупреди муштериите дека употребата на хербицидот може да предизвика рак, дејствувајќи „подмолно“. 46-годишниот тужител со години бил во контакт со големи количини хербици како вработен во повеќе училишта.

Повеќе: 

Очајно потребна доверба

Ангела Меркел имуна на глифосат

Во фокусот на судската постапка беше прашањето дали хемикалијата Глифосат, содржана во хемиското средство за уништување плевел, евентуално има поттикнувачко дејство за развој на рак. „Монсанто“, кој однеодамна припаѓа на концернот од Германија, „Бајер“, одрекува негативно влијание на својот производ, повикувајќи се на научни студии, според кои употребата на неговиот производ е без последици по човековото здравје. 

Меѓутоа, експертите се поделени во мислењето околу тоа дали Глифосатот навистина може да предизвика рак. Заклучокот на Американската еколошка служба ЕПА, како и надзорните служби од Германија и ЕУ е дека хербицидот не претстваува опасност во поглед на развој на рак.

Но, Меѓународната агенција за истражување на ракот, која припаѓа на Светската здравствена организација, пред три години констатираше дека Глифосатот веројатно стимулира развој на рак кај луѓето. 

Илјадници луѓе во САД заболени од рак одговорноста ја лоцираат кај „Монсанто“. Федерален судија во Сан Франциско минатиот месец одобри преку 400 натамошни тужби против концернот. „Монсанто“ најави обжалување на пресудата.