WHO ta jingine gwajin Hydroxychloroquine

Hukumar lafiyar ta ce ta na bukatar kwararrun jami'anta su sake yin nazari sosai akan dukkan wasu bayanai da suka danganci maganin kawo yau.

Shugaban hukumar ta WHO Tedros Adhanom Ghebreyesus ya shaidawa taron manema labarai cewa sun yi hakan ne sakamakon wata mukala da aka wallafa a makon da ya gabata da ya nuna cewa mutanen da ke shan maganin na hydroxychloroquine na iya kamuwa da ciwon bugun zuciya ko ma hadarin mutuwa baki daya.

A makon da ya gabata shugaban Trump yace yana amfani da maganin na  hydroxychloroquine duk da cewa ba shi da cutar ta corona.

Hukumomin kula da ingancin magunguna da abinci na Tarayyar Turai da na Amirka a watan Afrilu sun gargadi jami'an lafiya kada su yi amfani da maganin akan masu cutar corona a wajen asibiti ko wajen cibiyar binciken kimiyya saboda yana iya kasancewa da hadari matuka.