Tsohon lauyan Trump ya yi fallasa

Michael Cohen ya amince da aikata manyan laifukan takwas a ranar Talata cikin har da saba dokokin yakin neman zabe biyu bayan da ya cimma yarjejeniya da masu gabatar da kara a birnin New York.

Cohen tuni ya amince da amfani da kudin yakin neman zabe don ba da kudin toshiyar baki ga kwararriyar mai shirya fim din badalan nan Stormy Daniels wacce ke ikirarin cewa tana da alaka da ta shafi harkoki na rashin da'a da Shugaba Trump. Sauran batutuwan da ake tuhumar Cohen da su sun hadar da aikata ba daidai ba kan harkokin bankuna da haraji. Wannan bayani da Cohen ya yi cewa ya aikata laifukan na iya sawa ya share watanni daga 36 zuwa 60 a gidan kaso.