An yi sako-sako da tsarin dimukaradiyya

Kungiyar kare hakkin dan Adama ta Human Right Watch ta soki Shugaba Joe Biden na Amirka da wasu shugabannin kasashen Yammacin Duniya kan nuna sako-sako wajen kare tsarin dimukaradiyya da tunkarar kalubale na matsalolin annobar cutar Covid-19 da talauci, da rashin daidaito gami da rashin nuna adalci.

Kungiyar ta nuna yadda ake ci gaba da sayar da makamai ga kasashen da suka yi kaurin suna wajen kare hakkin dan Adam.

A wani rahoton kungiyar da aka wallafa a wannan Alhamis mai shafuka fiye da 750 kungiyar ta nuna yadda ake ci gaba da cin zarafin 'yan adawa da masu kajin kare hakkin dan Adam a kasashen China, Rasha, Belarus da Masar. Sannan an samu raunin tsarin dimukaradiyya a kasashen Hungari, Poland, Brazil, Indiya, har ta Amirka zuwa shekarar da ta gabata ta 2021.