Trump ya yi barazana kan gina katanga

A wata murya da bakasafai yake yin ta ba Trump ya nuna yadda matsaloli hadi da na tsaro ke karuwa a iyakar Amirka da Mexiko inda ya ce batun samar da katanga a iyakar abu ne mai muhimmanci ga tsaron kasar. Domin ganin ya ja hankali, shugaban na Amirka ya rika ba da misalai na wasu abubuwa na tashin hankali da ake gani a kan iyakar.

Da yake kara jaddada bukatarsa ta ganin 'yan majalisa sun amince masa da kashe Dala miliyan dubu biyar da dari bakwai don gina katangar ya nemi 'yan jam'iyyar Democrats su dawo su gana da shi a fadar White House. Ya ce kin yin wani abu a bangaren 'yan majalisar abu ne da ya sabawa yin da'a.