Tuhumar ta'addanci kan mahari a New Zealand

'Yan sandan kasar New Zealand sun tabbatar da tuhumar ayyukan ta'addanci kan mutumin da ya kashe mutane 51 a masallatai biyu a watan Maris, 'yan sandan sun ce sun maka Brenton Tarrant a kotu bayan tabbatar da duk wasu hujjoji na yunkurin ta'addanci.

Brenton Tarran mai shekaru 28 wanda dan kasar Australia ne, ana ganin ya kai harin ne bisa ra'ayin kansa ba tare da ya hada kai da wasu ko kuma kungiyoyi ba inda ya wallafa hotunan bidiyo kai tsaye a shafukan sada zumunta lokacin da ya kai hari.

Wannan mataki dai na zuwa ne bayan da wata kotu a kasar ta ba wa likitoci umarnin binciken lafiyar kwakwalwar maharin kafin ya sake bayyana a gabanta a watan Yunin da ke tafe.