Miliyoyin yara na fuskantar barazanar kamuwa da cutar kyanda

A rahotonsu na jiya Laraba, sanarwar ta kara da cewar sama da yara miliyan 40 ne basu cikashe rigakafinsu ba a shekarar da ta gabata, bisa tafiyar hawainiya da rigakafin ke fuskanta tun bayan bullar cutar corona a duniya.

Yanzu haka dai hukumar ta WHO ta ce miliyoyin yara ne ke fuskantar barazanar kamuwa da cutar, a shekarar 2021 sama da yara miliyan 9 ne cutar ta kamasu yayin da ta yi sanadiyyar rayukan kusan dubu 130 a fadin duniya.

Masana kimiya sun ce akwai bukatar yin rigakafi ga akalla kaso 95 cikin dari na al'umma da cutar ke wa barazana a wani mataki na dakile yaduwar ta da ke bazuwa tsakanin mu'amalar mutum da mutum ko ma a shaka ta iska.

Mafi akasari cutar kyanda ta fi yin illa ga yara a nahiyar Afirka da kuma kasashen yankin Asiya.