MDD ta nuna damuwa kan rincabewar rikici a Kwango

A baya-bayan nan fada dai ya kara kazanta a tsakanin 'yan tawayen M23 da kuma dakarun kasar. A cikin sanarwar da kwamittin ya fitar, ya yi Allah wadai da hare-haren da 'yan tawayen ke kara zafafa kai wa a farkon wannan watan a kusa da birnin Goma.

Kasar Kwangon da gwamnatocin kasashen yammacin Turai gami da kwararru a MDD na zargin 'yan tawayen da samun goyon bayan kasar Ruwanda, zargin da gwamnatin Kigali ta musanta.

Ko a karshen makon da ya gabata ne dai 'yan sanda suka harba hayaki mai sa hawaye domin tarwatsa masu zanga-zangar adawa da rashin tsaro a kasar. Masu boren sun yi ta kona tutocin kasashen Amirka da Beljiyam a gaban ofisoshin jakadancin kasashen yammacin Turai da kuma Majalisar Dinkin Duniya da ke fadar gwamnatin kasar, Kinsasha. Ana dai zargin dakarun wanzar da zaman lafiya na MDD da suka shafe shekaru 25 a kasar da gaza kawo karshen ayyukan ta'addanci.