Kudin bai daya a Afirka ta yamma | Labarai | DW | 25.10.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Kudin bai daya a Afirka ta yamma

Kungiyar ECOWAS na sake duba batun samar da kudaden bai daya da kuma yin kasuwanci na bai daya, a kashen Afirka ta yamma domin bunkasa tattalin arzikin yankin.

Shugabannin kasashe 15 na yammacin Afirka dake cikin kungiyar bunkasa tattalin arzikin Afirka ta yamma wato ECOWAS, na gudanar da wani taro na musamman a Dakar babban birnin kasar Senigal, domin duba batun yin kasuwancin bai daya da kuma samar da kudaden bai daya a tsakanin kasashen nan da shekara ta 2020.

Taron wanda ake sa ran zaifi mayar da hankali kan batun tattalin arzki, zai kuma duba batun rikicin kasashen Mali da Guinea-Bissau da kuma fargabar da ake yi ta barkewar rikicin bayan zabe a kasar Guinea Konakri.

Da yake zantawa da manema labarai gabanin taron a birnin Dakar na kasar Senigal, shugaban kungiyar ta ECOWAS Kadre Desire Ouedraogo, ya ce suna so su mai da hankali kan batun tattalin arziki a wanna karon, ba kamar a lokutan baya ba da kungiyar ta saba zamowa kan gaba wajen sasanta rikici da kuma al'amuran siyasa.

Mawallafiya:Lateefa Mustapha Ja'afar
Edita:Usman Shehu Usman