Kiran da paparoma ya yi a bikin Ista
March 31, 2013Shugaban Kiristoci mabiya dakikar Katolika na duniya Paparoma Francis ya jagoranci dubban mabiya a dandalin St Peters da ke fadar Vatican wajen shagulgular bikin ista da ke zama daya daga cikin bukukuwa mafiya daraja ga Kiristoci.
Cikin jawabinsa Paparoman ya nemi ganin an sasanta cikin ruwan sanyi tsakanin kasashen Koriya, tare da fatar ganin bayan rikice-rikice da ake samu a kasashe kamar Najeriya da Siriya da Kwango da Jamhuriyar Afirka ta Tsakiya da ma dai Iraki da sauran wurare.
A rana irin wannan a ka hakikance Yesu Almasihu ya tashi daga matattu. Tun ranar Jumma'a a ka fara wadannan bukukuwa na isata wadanda ake kammala zuwa gobe Litinin.Wannan ya zama karo na farko da Paparoma Francis, dan kasar Argentina ke jagorantar bukukuwan, bayan zaben da a ka yi masa ranar 13 ga wannan wata na Maris.
Mawallafi: Suleiman Babayo
Edita: Mouhamadou Awal Balarabe