Dakarun Amirka sun kashe jagoran al-Shabaab | Labarai | DW | 05.09.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Dakarun Amirka sun kashe jagoran al-Shabaab

Ma'akakatar tsaron Amirka ta tabbatar da kashe shugaban kungiyar al-Shabaab Ahmed Abdi Godane a wani farmaki da sojojin Amirka suka kai a ranar Litinin.

A wannan Jumma'a Amirka ta tabbatar cewa an kashe jagoran sojojin sa kai na kungiyar al-Shabaab a Somaliya a wani farmaki ta sama da Amirka ta kai a farkon wannan mako. Gwamnatin fadar White House na daukar wannan a matsayin babban naushi ga ayyukan kungiyar al-Shabaab mai alaka da kungiyar al-Qaida. Wata sanarwa da gwamnatin Amirka ta fitar ta ce mutuwar Ahmed Abdi Godane babbar asara ce ga 'yan ta'adda a Afirka kuma ta nuna irin kwarewar aikin hukumomin leken asiri da na soji da kuma kwararru na Amirka. A ranar Litinin da ta gabata Amirka ta kaddamar da hare-haren hadin guiwa da jiragen saman yaki marasa matuka da kuma masu matuka a kan wani taron kwamandojin al-Shabaab. Da ma dai ma'aikatar harkokin wajen Amirka ta sanya sunan Ahmed Godane a jerin manyan 'yan ta'adda takwas a duniya da ake nema ruwa a jallo.

Mawallafi: Mohammad Nasiru Awal
Edita: Usman Shehu Usman