1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Talabijin kai tsaye
Shirye-shiryen DW HausaBidiyo
Mayar da hankali
Ilimin Fasahar Zamani
Siyasa

Burunai: Dakatar da kisa ga 'yan luwadi

Yusuf Bala Nayaya MNA
May 6, 2019

Sarkin Burunai ya bayyana dakatar da shirin hukuncin Shari'a da ya tanadi kisan mutanen da aka kama da laifin aikata luwadi da mazinata, batun da ya jawo cece-ku-ce tsakanin al'ummomi na kasa da kasa.

https://p.dw.com/p/3HySM
Brunei Sultan Hassanal Bolkiah - Neue Gesetze
Hoto: Getty Images/AFP

Majalisar Dinkin Duniya dai ta bayyana dokar da aka nemi ta fara aiki a ranar uku ga watan Afrilu da zama mai tsaurin da ya wuce kima, yayin da Amirka da sauran wasu kasashe suka nemi Burunai ta dakatar da wannan shiri na jefe 'yan luwadi da mazinatan. Fitattun mutane da suka hadar da George Clooney da Elton John da sauransu sun yi kira na a kaurace wa otel-otel tara a Amirka da nahiyar Turai da ke da alaka da Burunai.

A jawabin da ya yi a ranar Lahadi gabanin fara watan Azumin Ramadana Sultan Hassanal Bolkiah ya bayyana cewa yana sane da tari na tambayoyi da rashin fahimta karkashin dokar ta Shari'a amma ya ce babu wani abu na haifar da fargaba.

A martani da ta mayar a wannan Litinin kan batun, babbar sakatariyar kungiyar Commonwealth Patricia Scotland ta ce dakatar da dokar kisan abun yabawa ne haka kuma akwai bukatar Burunai ta janye dokoki da suka hadar da yanke hannun masu laifin sata da ma yin bulala.