Boren adawa da fyade a Pakistan | Labarai | DW | 15.09.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Boren adawa da fyade a Pakistan

Masu fafutuka sun shirya gangamin yin Allah wadai da fyaden da a ka yiwa wata 'yar shekaru 5 a Pakistan.

Masu fafutukar kare hakin jama'a a Pakistan, sun gudanar da jerin gwanon yin tofin Allah tsine a sassa daban daban na kasar, domin nuna adawarsu a kan fyaden da a ka yi wa wata yarinya 'yar shekaru biyar a birnin Lahore, da ke gabashin kasar, birnin da kuma a ke samun zaman lafiya sosai, idan a ka kwatanta da sauran yankunan kasar.

Wani jami'in tsaron kasar, ya bayyana cewar, ya zuwa yanzu dai, jami'an 'yan sanda ba su da wani bayani dangane da mutumin da ya tafka wannan aika-aikar, duk kuwa da cewar, sun tsare mutane da dama da suke zargi, tare da sakinsu bayan yi musu tambayoyi. Idan za a iya tunawa dai, tun a ranar Alhamis (12. 09. 13) da ta gabata ce, a ka sace yarinyar, tare da yi mata mummunan fyade.

'Yan sandan sun kara da cewar, a ranar Jumma'a ce (13. 09. 13) a ka gano yarinyar kusa da wani asibiti, yini daya bayan saceta. Wani jami'in kula da lafiya a asibitin, Dakta Farzand Ali, ya ce ko da shike tana wurin da a ke kula da masu fama da rashin lafiya mai tsanani, amma tana samun ci gaba, sakamakon irin kulawar da take samu.

Mawallafi : Saleh Umar Saleh
Edita : Umaru Aliyu