1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Timu Yetu

Mazungumzo ya amani kati ya Israel na Palestina kuanzishwa rasmi leo Washington

Viongozi wa Israel na Palestina wanaanzisha rasmi mazungumzo ya amani hii leo. Kundi la Hamas linapinga vikali matokeo ya mkutano wa Annapolis

default

Rais Bush (katikati) waziri mkuu Ehud Olmert (kushoto) na rais Abbas

Waziri wa mashauri ya kigeni wa Marekani, Condoleezza Rice, amesema viongozi wa Israel na Palestina leo wataanzisha rasmi mazungumzo ya amani katika ikulu ya Marekani mjini Washington.

Kuanzishwa kwa mazungumzo hayo kunafanyika baada ya mkutano wa kihistoria kuhusu amani ya Mashariki ya Kati kufanyika mjini Annapolis katika jimbo la Maryland.

Katika mkutano huo viongozi wamekubaliana kwamba taifa huru la Palestina litaundwa kufikia mwishoni mwa mwaka ujao 2008.

Condoleezza Rice amesisitiza maneno yaliyosemwa na rais George W Bush kwamba maswala yote ambayo bado hayajapatiwa ufumbuzi yatatuliwa.

Rais Bush amesema huu ni wakati muafaka kuwadhihirishia Wapalestina kwamba ndoto yao ya kuwa na taifa huru inaweza kufikiwa katika meza ya amani. Aidha kiongozi huyo amesema kwa wakati huu machafuko yanayohubiriwa na wanamgambo wenye itikadi kali ni kikwazo kikubwa kinachozuia kuundwa kwa taifa huru la Palestina.

Rais Bush binafsi amesema amejitolea kwa dhati kutumia muda wake uliosalia kama rais wa Marekani kutafuta suluhisho la mataifa mawili la mgogoro wa Mashariki ya Kati.

Wakati haya yakiarifiwa maelfu ya wafuasi wa kundi la Hamas katika eneo la Ukanda wa Gaza wamefanya maandamano makubwa katika barabara za mjini Gaza kuyapinga matokeo ya mkutano wa Annapolis nchini Marekani.

Kiongozi wa Hamas, Ismail Haniya, amesema makubaliano yoyote yatakayofanywa na rais wa mamlaka ya ndani ya Wapalestina, Mahmoud Abbas, hayatakubalika.

Haniya, ambaye alitimuliwa na rais Abbas kutoka kwa wadhifa wake wa uwaziri mkuu, amekataa kurejesha uhusiano wa kawaida kati ya Wapalestina na Israel.

Muandamanaji mmoja ameuwawa mjini Hebron huko Ukingo wa magharibi wa mto Jordan wakati machafuko yalipozuka kati ya maafisa wa usalama walio watiifu kwa rais Mamhoud Abbas na wanamgambo wanaomuita msaliti.

  • Tarehe 28.11.2007
  • Mwandishi Josephat Charo
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/CTzL
  • Tarehe 28.11.2007
  • Mwandishi Josephat Charo
  • Shirikisha wengine Tuma Facebook Google+
  • Chapisha Chapisha ukurasa huu
  • Kiungo http://p.dw.com/p/CTzL

Sikiliza Matangazo Yetu

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com