100711 Murdoch GB
10 Korrik 2011Moguli australian i mediave Rupert Murdoch njoftoi se nuk ka plane për të bërë ndryshime në trupën e manaxhimit të lajmeve si pasojë e skandalit të përgjimeve në gazetën britanike "News of the World" e cila i takon grupit të tij mediatik.
Në një konferencë në SHBA Murdoch i tha agjencisë së lajmeve Reuters se asgjë nuk ka ndryshuar. Sidomos ish-kryeredaktorja e revistës së përjavshme "News of the World" Rebekah Brooks, gëzon besimin e tij të plotë iu përgjigj Murdoch pyetjes së një gazetareje.
Përpara se të dorëzonin për botim numrin e 8.674 të revistës, që ishte dhe i fundit i saj, redaktorët e "News of the World" iu kërkuan falje lexuesve të kësaj reviste, e cila vlerësohet se lexohet nga të paktën 7.5 milionë vetë.
Pas 168 vjetësh në treg James Murdoch, djali i Rupert Murdoch dhe shef i shtëpisë botuese News International, vendosi që revista të mbyllet për shkak të skandalit për përgjimet telefonike të kësaj medie, i cili shkaktoi një tërmet në opinionin publik. Sipas Scotland Yard dedektivë të ngarkuar prej gazetarëve të kësaj reviste bulevardeske kanë përgjuar telefonatat e rreth 4.000 vetëve.
James Murdoch, shef i shtëpisë botuese News International, tha për BBC-në, se praktikat e përdorura nga disa individë nuk u përgjigjen standardeve dhe cilësisë së gazetarisë në të cilat besoj unë vetë dhe kjo kompani.
Mënyra sesi "News of the World" mblidhte informacionet e saj, pra përmes përgjimit të telefonatave ka shkaktuar zemërim të madh në Britaninë e Madhe dhe u bë edhe objekt i një mbledhjeje në parlament. Gazetari i kësaj reviste për çështjet mbretërore si dhe dedektivi Mulcaire, që e furnizonte atë, u burgosën në vitin 2007 sepse kishin përgjuar telefonatat e oborrit mbretëror.
Autor: dw,dpa,bbc/PP
Redaktor: Aida Cama